Թուրքիայի խորհրդարանը վավերացրել է Իսրայելի հետ հարաբերությունների կարգավորման համաձայնագիրը

PanARMENIAN.Net - Թուրքիայի խորհրդարանը վավերացրել է Իսրայելի հետ հարաբերությունների կարգավորման համաձայնագիրը, որը վերջ կդնի հարաբերությունների 6-ամյա խզմանը և թույլ կտա վերականգնել երկրների դիվանագիտական հարաբերությունները:

Ըստ համաձայնագրի, Իսրայելը պետք է 25 օրվա ընթացքում միանվագ 20 մլն դոլար վճարի Թուրքիային: Դա փոխհատուցում է այն զոհերի համար, որոնք ունեցավ Թուրքիան իսրայելցի հատուկջոկատայինների և Mavi Marmara նավի թիմի բախման հետևանքով:

Ըստ համաձայնագրի, Իսրայելի քաղաքացիները պատասխանատվություն չեն կրի` քրեական և ֆինանսական, կատարվածի համար, հայտնում է «Դոժդը» Associated Press-ի վրա հղումով:

Ավելի վաղ Թուրքիայի վարչապետ Բինալի Յըլդըրըմը հայտարարել էր, որ Իսրայելը համաձայնել է Թուրքիայի առաջադրած բոլոր պայմաններին:

Երկրները նախկինում համարվել են ռազմավարական գործընկերներ, սակայն հեռացան, երբ Թուրքիայի արտաքին քաղաքականությունը եվրոպական ինտեգրումից շեղվեց դեպի արաբամահմեդական աշխարհ: Փոխադարձ սառեցման գագաթնակետը «Ազատության տորմիղի» հետ կապված միջադեպն էր, երբ 2010-ին իսրայելցիները կասեցրին Գազայի հատված ուղևորվող թուրքական նավերի առաջխաղացումը` սպանվեց 9 թուրք:

Այս միջադեպից հետո պաշտոնական Անկարան դիվանագիտական հարաբերությունները հասցրել էր նվազագույնի և սառեցրել ռազմական և առևտրային ոլորտում կնքված պայմանագրերը:

2015-ի վերջում ԶԼՄ-ները հայտնեցին, որ երկրները հարաբերությունների կարգավորման նախագիծ են պատրաստել, որը ներառում է դեսպանների վերադարձը և իսրայելյան բնական գազի առաքումը նախատեսող կետեր` բավարարելու համար ներքին պահանջարկն ու տարանցումը եվրոպական շուկա: