ԱԱ-2018-ի քառորդ եզրափակչի բոլոր մասնակիցները հայտնի են

4 հուլիսի 2018 - 11:15 AMT

PanARMENIAN.Net - Անգլիայի հավաքականը դարձել է ՌԴ-ում ընթացող ֆուտբոլի աշխարհի առաջնության քառորդ եզրափակչի վերջին մասնակիցը: Հուլիսի 3-ին անգլիացի ֆուտբոլիստները Մոսկվայում հաղթել են Կոլումբիային 4:3 հաշվով՝ 11-մետրանոցների շարքի արդյունքում: 57-րդ րոպեին հաշիվը բացել է անգլիացիների հարձակվող Հարրի Քեյնը՝ իրացնելով 11-մետրանոց հարվածը: Իսկ խաղի ավարտին մոտ հավասարությունը վերականգնել է կոլումբացի Յերի Մինան:

Դրան հաջորդած 11-մետրանոցների շարքում անգլիացիների դարպասը գրավեցին հարձակվողներ Ռադամել Ֆալկաոն և Լուիս Մուրյելը, ինչպես նաև կիսապաշտպան Խուան Կուադրադոն: Անգլիայի հավաքականի հարձակվողներ Հարրի Քեյնը, Մարկուս Ռաշֆորդն ու պաշտպան Կիրան Թրիփյերը նույնպես չվրիպեցին, իսկ վճռորոշ գոլի հեղինակ դարձավ կիսապաշտպան Էրիկ Դայերը:

Նույն օրը լավագույնների շարքին դասվեց Շվեդիայի հավաքականը: Սանկտ Պետերբուրգում նրանք հաղթեցին Շվեյցարիային՝ 1:0 հաշվով: Գոլի հեղինակ դարձավ կիսապաշտպան Էմիլ Ֆորսբերգը (66-րդ րոպե), որը հանդես է գալիս գերմանական «ՌԲ Լեյպցիգ» ակումբում, գրում է Deutsche Welle-ն:

Վճռորոշ հանդիպումներից առաջ առաջնությունում 2-օրյա հանգիստ կլինի: Հուլիսի 6-ին Նիժնի Նովգորոդում կհանդիպեն Ուրուգվայի և Ֆրանսիայի հավաքականները: Նույն օրը Կազանում աշխարհի 5-ակի չեմպիոն բրազիլացիներն ուժերը կչափեն Բելգիայի հավաքականի հետ:

Հուլիսի 7-ին Սամարայում կհանդիպեն Շվեդիայի և Անգլիայի հավաքականները: Քառորդ եզրափակիչների ծրագիրը կեզրափակի ՌԴ-Խորվաթիա հանդիպումը Սոչիում:

Հղումներ թեմայով.

Deutsche Welle: Определились все участники четвертьфиналов ЧМ-2018