Զոհրաբյանը՝ եվրոպական կառույցներին․ Ադրբեջանը սադրում է, թիրախավորում խաղաղ բնակչությանը

PanARMENIAN.Net - «Բարգավաճ Հայաստան» խմբակցության պատգամավոր Նաիրա Զոհրաբյանը դիմել է եվրոպական կառույցների ղեկավարներին՝ հրավիրելով նրանց ուշադրությունը հայ-ադրբեջանական սահմանային իրավիճակի, Ադրբեջանի սադրիչ գործողությունների վրա։

ԵԱՀԿ խորհրդարանական վեհաժողովի նախագահ Գեորգի Ծերեթելիին, Եվրոպայի խորհրդի խորհրդարանական վեհաժողովի նախագահ Ռիկ Դեմսին, ԵԽ Մարդու իրավունքների հանձնակատար Դունյա Միատովիչին ուղղված նամակում նա հայտնել է, որ տարբեր տրամաչափի զենքերից հրետակոծում են ՀՀ հյուսիս-արևելյան սահմանային բնակավայրերը։

«Նշանակետի տակ են Տավուշի մարզի բնակավայրերը, որոնք ահա արդեն երկու օր է ադրբեջանական կրակահերթերի նշանառության տակ են, և գնդակոծությունն իրականացվում է այնպիսի եղանակով, ինչը իրական սպառնալիք է քաղաքացիական բնակավայրերին, բնակիչների առողջությանն ու կյանքին, նրանց սեփականությանը»,- գրել է Զոհրաբյանը։

Նա հայտնել է, որ սահմանամերձ Մովսես գյուղի հրետակոծության հետևանքով վնասվել է բնակելի տուն, որտեղ այդ պահին եղել է չորս անչափահաս երեխա:

«Ռազմական այս սադրանքներն Ադրբեջանի քաղաքական ղեկավարության հետևողական ռազմատենչ հռետորաբանության շարունակությունն են, ինչը լրջորեն խախտում է միջազգային իրավունքի բոլոր հիմնարար սկզբունքները։ Ադրբեջանը հետևողականորեն արհամարհում է իր իսկ ստանձնած միջազգային բոլոր պարտավորություններն ու իր իսկ ստորագրած կոնվենցիաները, շարունակելով թիրախավորել խաղաղ բնակավայրերն ու խաղաղ բնակիչներին»,- հայտարարել է Զոհրաբյանը։

Սահմանային բախումների հետևանքով հայկական կողմը 2 զոհ ունի ու 5 վիրավոր, որոնց կյանքին վտանգ չի սպառնում: Ադրբեջանը պաշտոնապես հայտնել է 11 զոհի մասին:

Հուլիսի 12-ից հայ-ադրբեջանական սահմանին ռազմական գործողություններ են ընթանում, որոնք հրահրել է Ադրբեջանը: Բոլոր հրետակոծությունները թիրախավորվում են ՀՀ ԶՈւ կրակով և լռեցվում: Ադրբեջանական ԶՈւ-ն նաև ականակոծել է Չինարին, ապա՝ ԱԹՍ կիրառել Բերդի ուղղությամբ: Տուժածներ չկան։