Պետրակով․ Հավաքականին պետք են խաղացողներ, որոնք կուժեղացնեն թիմը

PanARMENIAN.Net - Հայաստանի ազգային հավաքականի գլխավոր մարզիչ Ալեքսանդր Պետրակովը Կոսովոյի հետ ընկերական խաղից առաջ լրագրողների հետ հանդիպմանն ասել է, որ թիմին անհրաժեշտ են այնպիսի խաղացողներ, որոնք կուժեղացնեն թիմը:

«Ազգային թիմը փորձարկումների համար չէ: Այո, այս պահին չկան խաղացողներ, որ կարող են ուժեղացնել հավաքականը: Եթե ցանկանում եք՝ ասեմ, թե շատ տաղանդավոր ու փառահեղ խաղացողներ ունեք, այդպես էլ ասեմ: Ամեն դեպքում, պետք է ճիշտը ասել: Չեմ ցանկանում նեղացնել որևէ մեկին, բայց անհրաժեշտ են այնպիսի խաղացողներ, որոնք կուժեղացնեն թիմը»,–ասել է նա, հայտնում է ArmSport–ը:

Անդրադառնալով երիտասարդներին փորձարկելու մասին հարցին՝ Պետրակովն ասել է, որ Էդգար Փիլոյանը Մ21 տարեկանների կազմում կարմիր քարտ է ստացել, այդ իսկ պատճառով միացել է մարզումային գործընթացին:

«Խաղը ցույց կտա՝ արդյոք կփորձարկե՞նք իրենց»,–ասել է նա:

Մարզիչը խոսել է նաև նորեկների մասին։

«Պիզելիի միջոցով կապ ենք հաստատել բրազիլական «Գրեմիոյի» դարպասապահի՝ Արթուր Կոնեղլյանի հետ, բայց նա հրաժարվել է միանալ Հայաստանի հավաքականին: Բոլորին դիտարկում ենք, ամեն դեպքում այդ աշխարհամասից ֆուտբոլիստների հրավիրելը ցանկալի չէ, գոնե այն պատճառով, որ այդքան երկար ճանապարհներից հետո ֆուտբոլիստները գալիս և զուտ ֆիզիկապես ցանկանում են 3-4 օր հանգստանալ, քնել»,–ասել է նա։

Խոսելով Տիգրան Բարսեղյանի և Խորեն Բայրամյանի մասին՝ Պետրակովնը խորհուրդ է տվել սպասել մինչև նոյեմբեր, երբ ավարտվում է իր պայամանգիրը։

«Եթե հնարավոր է՝ դիմացեք մինչև նոյեմբեր ամիս։ Իմ պայմանագիրը կավարտվի։ Նրանց վերադարձն էլ շատ հաղթական կլինի՝ տոնախմբություններ, հրավառություններ, զվարճանքներ»,–ասել է նա։

Խոսելով Կոսովոյի հավաքականի և մարտի 22–ի խաղի մասին՝ Պետրակովն ասել է, որ Կոսովոն լավ թիմ ունի, բոլոր տղաները խաղում են եվրոպական լավ թիմերում:

«Արդյոք անակնկալներ կլինե՞ն: Կարծում եմ՝ անակնկալներ չեն լինի: Ես երիտասարդ մարզիչ չեմ, որ հնարավոր լինի ինձ անակնկալի բերել: Առաջին իսկ 10 րոպեի ընթացքում կհասկանամ, թե ինչպես են մտադիր խաղալ:

Չանչարևիչին հարցրել եմ Կոսովոյից, բնակչությունից, խաղացողներից: Շատ պինդ ու ամուր թիմ են: Գլխով են հիանալի խաղում, պաշտպանական գիծն է ինձ շատ դուր գալիս: Շատ լավ խաղացողներ ունեն, որոնք խաղում են եվրոպական առաջատար առաջնություններում: Շատ ցանկալի կլիներ հասնել դրական արդյունքի վաղվա խաղում: Սա ֆուտբոլ է, ու պետք է խնդիր լուծել»,–ասել է մարզիչը։