«Արարատ 73»-ի ֆուտբոլիստը համոզված է, որ Հայաստանի հավաքականը կկարողանա հաղթել Ռուսաստանի թիմին

21 մարտի 2011 - 14:16 AMT

PanARMENIAN.Net - «Արարատ 73»-ի ֆուտբոլիստ և Հայաստանի Ֆուտբոլի վետերանների միության նախագահ Սերգեյ Պողոսյանը կարծում է, որ ֆուտբոլի Հայաստանի հավաքականը պոտենցիալ ունի և արդյունավետ խաղ է ցուցաբերում:

«2010-ի խաղերում հայ ֆուտբոլիստները ցուցադրել են հավաքական ֆուտբոլ և իրենց խաղով առանձնանում են անցյալ տարիների Հայաստանի հավաքականներից: Հայաստանի հավաքականը Եվրոպայի առաջնության եզրափակիչ փուլ մտնելու իրական շանս ունի, հնարավոր է` նման շանս այլևս չլինի: Թիմը վերելքի ճանապարհին է, տիրում է ընկերական և ջերմ մթնոլորտ»,- ասել է Պողոսյանը Երևան-Մոսկվա հեռուստակամրջի ժամանակ, որը կայացել է մարտի 21-ին Երևանում:

«Արարատի» նախկին ֆուտբոլիստը կարծում է, որ ամենագլխավորն է չընկրկել Ռուսաստանի հավաքականի դեմ խաղում, որը կայանալու է մարտի 26-ին Երևանում և խաղին պատրաստվել շատ մանրակրկիտ: «Մեր հավաքականի հետ կլինի նաև «12-րդ խաղացողը»: Հանդիսատեսը միշտ անկեղծ երկրպագել է մեզ և աջակցելու է հավաքականին Ռուսաստանի հավաքականի դեմ խաղում»,- ասել է Պողոսյանը:

Նա կարծում է, որ Հայաստանի հավաքականն ուժեղ մարզիչ ունի, որի ղեկավարությամբ հավաքականը շատ լուրջ պատրաստվում է. «Մենք հուսով ենք, որ Հայաստանի հավաքականը ոչ միայն կցուցադրի գեղեցիկ ֆուտբոլ, այլ նաև կկարողանա արդյունքի հասնել»: