ԵՄ. Թուրքիան կանգնած է տեւական քաղաքական ճգնաժամի եզրին

PanARMENIAN.Net - Թուրքիան կանգնած է տեւական քաղաքական ճգնաժամի եզրին, հայտարարում են Եվրամիության ներկայացուցիչները: «Տարբեր քաղաքական կուսակցությունների պայքարը Թուրքիայի ապագա զարգացման համար ընկղմում է երկիրը տեւական քաղաքական ճգնաժամի մեջ»,-թուրք լրագրողներին տված հարցազրույցում հայտարարել է Եվրամիության ընդլայնման հարցերով հանձնակատար Օլի Ռենը: Իշխող Արդարության եւ զարգացման կուսակցության գործունեության հնարավոր արգելքի հետեւանքով երկրի տնտեսության համար բացասական հետեւանքների մասին է զգուշացրել նրա առաջնորդ, վարչապետ Ռեջեփ Թաիփ Էրդողանը: «Եթե գործընթացը ձգձգվի, կտուժի մեր տնտեսությունը: Մենք արդեն իսկ տեսնում ենք, որ արտերկրյա կապիտալի արտահոսք է տեղի ունենում: Մեզ մեղադրում են աշխարհիկ Թուրքիային շարիաթի ռեժիմը պարտադրելու մեջ: Մենք հասարակ թուրքերի կուսակցություն ենք: Հավատացյալ թուրքերը աշխարհիկ պետության սկզբունքների պաշտպաններն են: Թուրքիան կարողացել է գտնել եւ պահպանել հավասարակշռությունը իսլամի եւ ժողովրդավարության միջեւ, հաղորդում է «Ազատություն» ռադիոկայանը:



Թուրքիայի Սահմանադրական դատարանը մարտի վերջից ի վեր քննարկում է իշխող կուսակցության լուծարման մասին հարցը: Ավելի վաղ Սահմանադրական դատարանն արդեն արգելել է Բարեկեցության կուսակցությունն ու Բարգավաճման կուսակցությունը` քաղաքական նպատակներով կրոնի օգտագործման համար: