Ահմեդ Դավութողլու. Հայաստանը չի համարձակվի Թուրքիայից պահանջել տարածքներ

PanARMENIAN.Net - Թուրքիայի ԱԳ նախարար Ահմեդ Դավութողլուն ելույթ է ունեցել Թուրքիայի Ազգային մեծ ժողովում, ներկայացնելով թուրք պատգամավորներին Ցյուրիխում ստորագրված Արձանագրությունները: Իր ելույթում ԱԳ նախարարը ընդգծել է, որ Անկարայի արտաքին քաղաքականության հիմնական նպատակն է` Թուրքիայի շուրջ հաստատել խաղաղություն եւ կայունություն: «Մենք փորձում ենք տարածաշրջանում հաստատել փոխադարձ ըմբռման մթնոլորտ եւ հիմք ստեղծել քաղաքական երկխոսության համար, որը կօգնի լուծել տարածաշրջանում գոյություն ունեցող բոլոր խնդիրները: Կովկասում առկա ստատուս-կվոն չի համապատասխանում մեր տեսակետին, քանի որ տարածաշրջանում կան սառեցված հակամարտություններ, որոնք ցանկացած պահին կարող են պայթել», - ընդգծել է Դավութողլուն: Նա նորից շոշափել էր «ադրբեջանական հողերի օկուպացման» թեման, եւ նշել է, որ առկա ստատուս-կվոյի պայմաններում Թուրքիան չի կարող արդյունավետ գործել:



«Այդ գործընթացում մենք ունենք երեք կարեւոր նպատակ: Առաջինը` Հայաստանի հետ բարի դրացիական հարաբերություններ հաստատել: Երկրորդ` հաստատել առողջ երկխոսություն երկու երկրների հասարակությունների միջեւ: Եվ երրորդ` արագացնել Հայաստանի եւ Ադրբեջանի միջեւ հակամարտության գործընթացի կարգավորումը», - ասել է նա:



Թուրքիայի ԱԳ նախարարը նշել է նաեւ, որ ոչ Հայաստանը, ոչ էլ որեւէ այլ երկիր չի համարձակվի Թուրքիայից պահանջել տարածքներ, եւ «Հայաստանի եւ Թուրքիայի միջեւ ստորագրված Արձանագրությունները ամրագրում են այդ հանգամանքը»: «Հայաստանի եւ Թուրքիայի միջեւ սահմանները որոշվում են Կարսի եւ Մոսկվայի պայմանագրերով, եւ Արձանագրությունները հղում են անում այդ պայմանագրերին», - հայտարարել է Ահմեդ Դավութողլուն, եւ ավելացրել, որ Անկարան կշարունակի գործադրել ամեն ջանք, որպեսզի պաշտպանի Ադրբեջանի ամբողջականությունը, հաղորդում է Anatolian News Agency-ն: