Կիպրոսի ԱԳ նախարարը դատապարտել է ՀՀ-ի դեմ Ադրբեջանի ագրեսիան

PanARMENIAN.Net - Կիպրոսի արտաքին գործերի նախարարը Նիկոս Խրիստոդուլիդեսը դատապարտել է Հայաստանի նկատմամբ ադրբեջանական ագրեսիան, հայտնում են ՀՀ ԱԳՆ-ից՝ նշելով, որ նախարար Զոհրաբ Մնացականյանը հեռախոսազրույց է ունեցել կիպրոսցի գործընկերոջ հետ։

Հուլիսի 15-ի գիշերը հայ-ադրբեջանական սահմանին հարաբերականորեն հանգիստ է եղել։ Հուլիսի 12-ից ռազմական գործողություններ են ընթանում, որոնք հրահրել է Ադրբեջանը: Բոլոր հրետակոծությունները թիրախավորվում են ՀՀ ԶՈւ կրակով և լռեցվում: Հայկական կողմը 4 զոհ ունի ու 20 վիրավոր, որոնցից 10-ը դուրս են գրվել, բուժվում է 10 հոգի։ Ադրբեջանը պաշտոնապես 11 զոհի մասին է հայտնել:

Ադրբեջանական ԶՈւ-ն նաև ականակոծել է Չինարին, Այգեպարը, Ներքին Կարմիրաղբյուրը, հրետակոծության ենթարկել նաև Բերդ քաղաքը:

Նախարարը տեղեկացրել է Ադրբեջանի սադրիչ գործողությունների, այդ թվում վերջինիս կողմից քաղաքացիական ենթակառուցվածքների և բնակչության թիրախավորման վերաբերյալ:

Ավելի վաղ Կիպրոսի Ներկայացուցչական պալատի նախագահ Դեմետրիս Սիլուրիսը հայտարարել էր, որ Կիպրոսը հայ ժողովրդի կողքին է և իրենք հուսով են, որ տարաձայնությունները կլուծվեն խաղաղ ճանապարհով։

Հայաստանի և Կիպրոսի արտաքին քաղաքական գերատեսչությունների ղեկավարներն անդրադարձել են նաև տարածաշրջանում կայունության և անվտանգության հարցերի:

«Այս համատեքստում ՀՀ ԱԳ նախարարը խիստ անհանգստացնող գնահատեց հայ-ադրբեջանական սահմանային լարվածության վերաբերյալ Թուրքիայի անվերապահ աջակցությունն Ադրբեջանի ագրեսիային՝ որպես տարածաշրջանում անկայունության հրահրման և անվտանգության խաթարմանն ուղղված թուրքական իշխանությունների գործելակերպի հերթական արտահայտություն»,-ասվում է ԱԳՆ հաղորդագրության մեջ։

Ավելի վաղ Թուրքիայի ԱԳՆ-ն հայտարարել էր, որ թե Տավուշում ագրեսորը հայկական կողմն է, իսկ իրենք Ադրբեջանի կողքին են։