Սփյուռքի հարցերով նախարարը նշում է արեւմտահայերենի պահպանման կարեւորությունը

PanARMENIAN.Net - Լատինական Ամերիկայի եւ Մերձավոր Արեւելքի երկրների հայկական համայնքների մշակութային-կրթական համագործակցության ծրագրերն արդեն մշակվել եւ հաստատվել են Հայաստանի Սփյուռքի հարցերով նախարարության կողմից: Այդ մասին Երեւանում մամլո ասուլիսի ժամանակ հայտարարել է Հայաստանի սփյուռքի նախարար Հրանուշ Հակոբյանը: «Մենք նախատեսում ենք նման ծրագիր մշակել Ռուսաստանի բոլոր մարզերի համար, որտեղ ամենամեծ հայ համայնքն է: Իհարկե, յուրաքանչյուր համայնքի համար նախարարությունը քայլեր է ձեռնարկում արեւմտահայերեն լեզվի պահպանության համար, որը հայ ժողովրդի ազգային արժեքն է: Այդ արժեքը պահպանելու համար նախարարության նախաձեռնությամբ լույս են տեսնելու հեքիաթներ եւ առակներ արեւմտահայերենով»,- հայտարարել է Հրանուշ Հակոբյանը:



Մամլո ասուլիսի ժամանակ Հրանուշ Հակոբյանը կոչ է արել Ֆրանսիայի հայ համայնքին բոլոր ջանքները գործադրել նրա համար, որպեսզի «Արաչ» թերթը, որը հրատարակվում է Փարիզում եւ բազմամյա պատմություն ունի, շարունակի հրատարակվել: Բացի դրանից, նա ուշադրություն դարձրեց Ռուսաստանի մարզերում հայկական կիրակնօրյա դպրոցներ բացելու անհրաժեշտության վրա: