Հայաստանի բյուջեի դեֆիցիտը 2009 թվականին կարող է գերազանցել ՀՆԱ-ի 7,5 տոկոսի մակարդակը

7 հուլիսի 2009 - 15:26 AMT

PanARMENIAN.Net - ՀՀ կառավարությունը ԱԺ-ին է ներկայացրել բյուջեի դեֆիցիտը մինչեւ ՀՆԱ-ի 7,5 տոկոսի բարձրացման նախագիծը, հաղորդել է ՀՀ վարչապետ Տիգրան Սարգսյանը «Համաշխարհային ճգնաժամի ազդեցությունը Հայաստանի վրա` կարճաժամկետ ու երկարաժամկետ հեռանկարներ» խորագրով գիտաժողովում: «Սա աննախադեպ ցուցանիշ է Հայաստանի համար, քանի որ վերջին մի քանի տարում մեր դեֆիցիտը երբեք չի գերազանցել 3 տոկոսը եւ միշտ եղել է նախատեսվածից ցածր: Այսօր չի բացառվում, որ բյուջեի ճեղքվածքը 2009 թվականին կարող է գերազանցել ՀՆԱ-ի 7,5 տոկոսի մակարդակը:

Սարգսյանը հիշեցրել է, որ ԱԺ-ն հաստատել է 940 մլրդ բյուջեն եւ կառավարությունը մտադիր չէ սեկվեստր կիրառել: «Մենք մտադիր չենք սեկվեստր կիրառել, քանի որ այն բացասաբար կանդրադառնա մակրոտնտեսական ցուցանիշների վրա»,-ասել է նա: Այս համատեքստում Տ.Սարգսյանը հավելել է, որ այս դեպքում նպատակահարմար կլինի ավելացնել բյուջեի դեֆիցիտը:

Վարչապետն ասել է, որ դեֆիցիտը կֆինանսավորվի Ասիական զարգացման բանկի վարկային միջոցների հաշվին` շուրջ 80 մլն դոլար, ՀԲ-ի- 50 մլն դոլար, 24 մլրդ դրամ կօգտագործվի ռուսական վարկից, ինչպես նաեւ 24 մլրդ դրամ ներքին շուկայից:

Այս առնչությամբ Սարգսյանը նշել է, որ ամենախոշոր ներդրումը կլինի Արժույթի միջազգային հիմնադրամի վարկային միջոցներից` շուրջ 150 մլն դոլար: Ընդ որում նա հավելել է, որ նախատեսվում է ԱԺ արտահերթ նիստ գումարել` այս պայմանագրի վավերացման նպատակով: