ՎիվաՍել-ՄՏՍ-ը միկրոէլեկտրոնիկայի յոթերորդ միջազգային օլիմպիադայի գլխավոր հովանավորն է

PanARMENIAN.Net - ՎիվաՍել-ՄՏՍ-ը PanARMENIAN.Net ին տեղեկացնում է, որ միկրոէլեկտրոնիկայի հայաստանյան ամենամյա 7-րդ միջազգային օլիմպիադայի եզրափակիչ փուլում մրցանակակիրներից հաղթող են ճանաչվել 24-ը` 10 անվանակարգում: ՎիվաՍել-ՄՏՍ-ն օլիմպիադայի գլխավոր հովանավորն է, իսկ Սինոփսիս Արմենիան օլիմպիադայի հովանավորն ու գլխավոր կազմակերպիչը:

Հայաստանում Սինոփսիսի շաբաթվա շրջանակներում անցկացվող այս տարվա օլիմպիադան մասնակից երկրների լայն աշխարհագրություն ուներ՝ Բելառուս, Չինաստան, Եգիպտոս, Գերմանիա և այլն: Օլիմպիադայի 418 մասնակիցներից 191-ը հայաստանյան ԲՈՒՀ-երի և ՏՏ ընկերությունների, իսկ 227-ը՝ միջազգային համալսարանների և կազմակերպությունների ներկայացուցիչներ էին:

Օլիմպիադան բացահայտում է մինչև 30 տարեկան առավել խելացի և տաղանդավոր ճարտարագետներին:

Օլիմպիադան իրականացվում էր երկու փուլով: Առաջին փուլը ստուգարքի ձևով անցկացվել է սեպտեմբերին`մասնակից բոլոր երկրներում: Երկրորդը ներառել է ինքնատիպ լուծումներ պահանջող ճարտարագիտական խնդիրներ: Առաջին փուլի 418 մասնակիցներից երկրորդ փուլ են անցել 34-ը, որոնցից 18-ը Հայաստանից էին (14-ը Երևանից, չորսը՝ Գյումրիից), իսկ 16-ը՝ տարբեր երկրներից:

«Հայաստանում կրթության որակը կկանխորոշի մեր ապագան: Այն էական դեր ունի երկրի մրցակցային առավելությունները խթանելու հարցում: Անհրաժեշտ է հնարավորինս քաջալերել նման նախաձեռնությունները »,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: