Եվրախորհրդի ղեկավարը ՌԴ դեմ նոր պատժամիջոցների համաձայնեցման բարդությունների մասին

9 մարտի 2015 - 13:14 AMT

PanARMENIAN.Net - Եվրախորհրդի նախագահ Դոնալդ Տուսկը հայտարարել է, որ այժմ «անհնար է» հասնել միասնության ԵՄ անդամ երկրների միջև Ռուսաստանի դեմ պատժամիջոցների խստացման հարցում:

Ըստ Տուսկի, «որոշ եվրոպացի քաղաքական գործիչներ պատրաստ են հավատալ, որ շանս կա, որ Վլադիմիր Պուտինն ու Ռուսաստանը բարի կամք կդրսևորեն», գրում է ՌԲԿ-ն:

Ըստ Եվրախորհրդի ղեկավարի, նա «ավելի հոռետես է» այդ հարցում: Այդ մասին Տուսկը հայտարարել է The New York Times-ին տված հարցազրույցում ԱՄՆ իր այցի շեմին:

Ինչպես կարծում է Տուսկը, այժմ անհրաժեշտ է «մշտական ջանքեր» գործադրել Եվրոպայի առաջնորդներին պառակտելու Ռուսաստանի ջանքերին դիմակայելու համար:

Եվրամիության ղեկավարը նշել է նաև, որ մտավախություն ունի, որ Ռուսաստանը «օգտագործելով ռազմական ու տնտեսական գործիքներ, ձգտում է հսկողության տակ առնել ամբողջ Ուկրաինան»: Անդրադառնալով ԵՄ երկրների միջև Ռուսաստանի հանդեպ նոր պատժամիջոցների հարցում համաձայնության հասնելու անհնարինությանը՝ Տուսկը հայտարարել է, որ «շատ բարդ է փոխզիջման հասնել 28 երկրների, ընդ որում, ժողովրդավարական պետությունների, միջև»:

Ինչպես ասել է Եվրախորհրդի ղեկավարը, ՌԴ դեմ պատժամիջոցներից շատերը «ավելի հեռուն են գնում, քան դա կցանկանային ԵՄ որոշ երկրների իշխանությունները»:

Տուսկը նշել է, որ իրեն մտահոգում է այն փաստը, որ որոշ եվրոպացիներ հիմա կարող են «մտորել հնարավոր հակամարտության կամ պատերազմի մասին»: Ըստ Տուսկի, այժմ դա անընդունելի է, դա անպաշտպան է դարձնում Եվրոպան Ռուսաստանի կամ այլ երկրների հակաժողովրդական ուժերի ագրեսիվ գործողություններից արևմտյան արժեքների պաշտպանության հարցում:

ԱՄՆ այցի ընթացքում Եվրախորհրդի ղեկավարը կհանդիպի ԱՄՆ նախագահ Օբամայի և փոխնախագահ Ջո Բայդենի հետ: Հանդիպման հիմնական նպատակներից մեկը կլինի իրավիճակն Ուկրաինայում: Մարտի 7-ին ԵՄ երկրների ԱԳՆ ղեկավարների հանդիպմանը Ռիգայում նախարարների մեծ մասը նշեց, որ ԵՄ-ն պետք է խստացնի պատժամիջոցները, եթե Դոնբասում հրադադարի խախտման լուրջ դեպքեր լինեն:

Միևնույն ժամանակ ԱԳ որոշ նախարարներ, մասնավորապես Իտալիայի ԱԳ նախարար Պաոլո Ջենտիլոնին և Ավստրիայի ԱԳ նախարար Սեբաստիան Կուրցը հայտարարեցին, որ ՌԴ դեմ նոր պատժամիջոցների կարիք չկա:

Ինչպես նշում է Reuters-ը, Ռուսաստանի դեմ պատժամիջոցների հարցում ԵՄ երկրների դիրքորոշումներում պառակտում է նկատվում: Առավել կոշտ դիրքորոշում ունեն Մեծ Բրիտանիան, Լեհաստանը և Բալթիայի երկրները: Իտալիան, Ավստրիան, Կիպրոսն ու Հունաստանը հոռետեսորեն են տրամադրված Մոսկվայի դեմ նոր պատժամիջոցների հարցում: Երկարացնելու համար 2014-ի ամռանը ՌԴ դեմ սահմանված պատժամիջոցների գործողությունը, հարկավոր է ԵՄ բոլոր 28 երկրների միաձայն որոշումը:

Հղումներ թեմայով.

РБК: Туск рассказал о сложностях в согласовании новых санкций против России