Քրդերը հետ են մղել ԻՊ ուժերին Թուրքիային սահմանակից ռազմավարական քաղաքից. Թուրքերը մտահոգված են

PanARMENIAN.Net - Քրդերի Ինքնապաշտպանության ժողովրդական ջոկատները (YPG) հայտարարել են, որ հետ են մղել «Իսլամական պետության» գրոհայիններին ռազմավարական նշանակության սիրիական Թել Աբիադ քաղաքից, որը սահմանակից է Թուրքիային: Այդ մասին հունիսի 15-ին հայտնել է Reuters գործակալությունը:

Ավելի վաղ այդ մասին հայտնել էր Սիրիայի մարդու իրավունքների պաշտպանության կենտրոնը: Տեղեկատվությունը քաղաքի գրավման մասին հաստատել է Reuters-ի լուսանկարիչը, որը գտնվում էր իրադարձությունների վայրում: Բացի այդ, քրդերին, ըստ նախնական տվյալների, հաջողվել է փակել Թել Աբիադ-Ռաքքա ռազմավարության նշանակության մայրուղին:

Ըստ Al Mayadeen հեռուստաալիքի, քուրդ աշխարհազորայինները նաև գրավել են սահմանամերձ տերմինալը Սիրիայի տարածքում` փախուստի մատնելով ԻՊ գրոհայիններին; Այժմ իսլամիտսները հանձնվում են թուրք զինվորականներին: YPG մարտիկները շարժվում են դեպի խալիֆայության խորքը Կոբանիի ապաշրջափակումից հետո: Թել Աբիադը ռազմավարական նշանակություն ունի երկու կողմերի համար: Քրդերը, վերահսկելով քաղաքը, կարող են միավորել ուժերը Սիրիայում և Իրաքում: Թել Աբիադի անկումով ԻՊ ռազմավարական հենակետ Ռաքքան կտրվում է մատակարարման ուղիներից, հայտնում է Լենտա.ռու-ն:

ԱՄՆ-նում բարձր գնահատեցին քրդերի հաջողությունները: Թուրքիայի նախագահն իր հերթին մտահոգություն հայտնեց YPG առաջխաղացման վերաբերյալ` հայտարարելով, որ դա կարող է «հանգեցնել թուրքական սահմանների անվտանգությանը սպառնացող կառույցի ստեղծման»: Անկարան մտավախություն ունի, որ YPG շարքերում ԻՊ դեմ մարտնչող թուրքաբնակ քրդերը զենքը Թուրքիայի դեմ կուղղեն:

2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Ծայրահեղականները հաջողության են հասել նաև իրաքյան տարածքներում՝ վերահսկողություն սահմանելով երկրի արևմուտքում մի քանի քաղաքների վրա: Հուլիսի վերջում նրանք հայտարարեցին Իրաքի ու Սիրիայի տարածքում խալիֆայության ստեղծման մասին:

Զինված հակամարտությունն Իրաքի հյուսիսում սկսվեց «Իսլամական կազմակերպության» գրոհից հետ Մոսուլի ուղղությամբ, որն ահաբեկիչները գրավեցին հունիսի լույս 10-ի գիշերը: Ըստ որոշ գնահատականների, 1300 զինյալներ գրավեցին Նայնավա գավառի կառավարական հաստատությունները, բանակային օբյեկտները և Մոսուլի միջազգային օդանավակայանը: Մոտ 500 հազար բնակիչներ փախան քաղաքից: Գրոհայինները զանգվածային մահապատիժներ են իրականացնում Իրաքի բանակի զինծառայողների ու բնակիչների շրջանում գրավյալ տարածքներում: Հայտնի է առնվազն մի քանի հարյուր սպանվածների մասին: Մարտական գործողություններն ուղեկցվում են զանգվածային բնաջնջմամբ: Ըստ արևմտյան երկրների ԶԼՄ-ների, հակամարտության գոտում արդեն մոտ 10 հազար քրիստոնյա ու եզդի է սպանվել:

Իսլամիստների դեմ միջազգային կոալիցիան գլխավորող ԱՄՆ-ն ռմբակոծում է Իրաքի տարածքում գտնվող ԻՊ դիրքերը օգոստոսի կեսից, իսկ առաջին հարվածները Սիրիայի տարածքին հասցվեցին սեպտեմբերի 23-ին: Սեպտեմբերի 26-ին Պենտագոնը հանդես եկավ Իրաքում ու Սիրիայում ցամաքային գործողություն սկսելու օգտին: