Սաղաթելյան․ Եթե ընդդիմությունը սեպտեմբերին գնա խորհրդարան՝ ապա միայն իր օրակարգով

PanARMENIAN.Net - ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը հայտարարել է, որ եթե ընդդիմությունը սեպտեմբերին գնա խորհրդարան՝ ապա միայն իր օրակարգով։

«Եթե ընդդիմությունը սեպտեմբերին գնա խորհրդարան, ապա՝ միայն իր օրակարգով: Այս հարցում դիրքորոշման փոփոխություն չկա»,-ասել է նա, հայտնում է «Երկիր մեդիան»։

Սաղաթելյանն ասել է, որ երկրում կա խորհրդարանական ճգնաժամ, քաղաքական ճգնաժամ, և եթե հերթական ապօրինի ու հակասահմանադրական ճանապարհով փորձեն ընդդիմությանը զրկել մանդատներից, երկրում կլինի նաև լիարժեք սահմանադրական ճգնաժամ։

Նա ընդգծել է, որ ընդդիմության հետ շանտաժի լեզվով չեն կարող խոսել, իրենք ուսանող չեն, որ բացակայությունների պատճառով կարողանան հեռացնել։

Ըստ Սաղաթելյանի՝ իշխանական պատգամավորների օրակարգն ընդհանրապես չի սպասարկում հայ ժողովրդի շահը, իսկ ընդդիմության բոլոր նախաձեռնությունները բոյկոտվել են։

Նա խորհրդարանական աշխատանքների բոյկոտն արդարացված է համարում․ շարժման շնորհիվ է, որ Արցախի հարցում իշխանության հռետորաբանությունը փոխվել է, բայց սա դեռ ձեռքբերում չէ:

Սաղաթելյանը հավելել է, որ ներկայումս «Դիմադրություն» շարժումը կազմակերպական աշխատանքների փուլում է, իսկ սեպտեմբերից պայքարը նոր շունչ ու ոգի է ստանալու։

Ազգային ժողովի պատգամավորների լիազորությունները դադարեցնելու համար Սահմանադրական դատարան դիմելու հարցով ՀայաստանիԱզգային ժողովի խորհրդի` հուլիսի 22-ի արտահերթնիստը չի կայացել։ Մինչև ժամը 12:30-ը քվորում չի ապահովվել. ԱԺ խորհրդի արտահերթ նիստը համարվել է չկայացած: