ԱԳ փոխնախարար․ Բաքվի հետ տարաձայնություններ դեռ կան, բայց Երևանը հուսով է՝ կհաջողվի հասնել միասնական տեքստի

PanARMENIAN.Net - ԱԳ փոխնախարար Վահան Կոստանյանը հայտարարել է, որ Հայաստանի և Ադրբեջանի միջև խաղաղության պայմանագրի տեքստի վերաբերյալ դիրքորոշումներում որոշակի տարաձայնություններ դեռ կան, սակայն Երևանը լիահույս է, որ կհաջողվի հասնել միասնական տեքստի։ Նա այդ մասին ասել է Իրանի դեսպանությունում սգո մատյանում ցավակցական գրառում անելուց հետո, տեղեկացնում է 24news.am-ը։

Կոստանյանն ասել է, որ պաշտոնական Երևանը պատրաստակամ է հարաբերությունները կարգավորել և խաղաղության մասին համաձայնագիրը ստորագրել և հետո կյանքի կոչել։

«Յուրաքանչյուր հանդիպմանը փորձում ենք երկու կողմերի դիրքորոշումներն էլ ավելի մոտեցնել իրար»,- ասել է փոխնախարարը։

Անդրադառնալով այն հարցին, թե ինչու Ադրբեջանը չի ցանկանում Ալմաթիի հռչակագիրը որպես սահմանազատման հիմք ընդունելու դրույթը ներառել պայմանագրի տեքստում՝ փոխնախարարը նշել է, որ այդ դրույթը կա սահմանազատման հանձնաժողովների համատեղ հրապարակած փաստաթղթում և աշխատանք է տարվում պայմանագրում ևս այն ներառելու ուղղությամբ։

Պատասխանելով ՀՀ և Ադրբեջանի ԱԳ նախարարների նոր հանդիպման հավանականության մասին հարցին՝ Կոստանյանն ասել է, որ այս պահի դրությամբ նման պայմանավորվածություն դեռ չկա, իսկ լինելուի դեպքում պատշաճ կտեղեկացվի։

2024թ. մայիսի 10-11-ին Ղազախստանի Ալմաթի քաղաքում տեղի ունեցած բանակցություններում ՀՀ արտաքին գործերի նախարար Արարատ Միրզոյանը ե Ադրբեջանի ԱԳ նախարար Ջեյհուն Բայրամովը ողջունել են սահմանազատման հարցում առաջընթացը ե այդ ուղղությամբ ձեռք բերված պայմանավորվածությունները: Նախարարները ե նրանց պատվիրակությունները շարունակել են «Հայաստանի ե Ադրբեջանի միջե խաղաղության ե միջպետական հարաբերությունների հաստատման վերաբերյալ» երկկողմ համաձայնագրի նախագծի շուրջ քննարկումները: Կողմերը պայմանավորվել են շարունակել բանակցությունները բաց հարցերի շուրջ, որտեղ դեռ կան տարաձայնություններ: