  Հայաստանն ակտիվորեն աշխատում է հայկական բանակի մարտունակության բարձրացման ուղղությամբ 23 մարտի 2011 - 16:23 AMT PanARMENIAN.Net - Հայաստանն ակտիվորեն աշխատում է հայկական բանակի մարտունակության բարձրացման ուղղությամբ: Այդ մասին ասվել է ՀՀ պաշտպանության նախարարությունում տեղի ունեցած պաշտպանության ռազմավարական վերանայման աշխատանքները համակարգող միջգերատեսչական հանձնաժողովի նիստում: Նիստում հանդես են եկել Ազգային անվտանգության խորհրդի քարտուղար Արթուր Բաղդասարյանը և պաշտպանության նախարար Սեյրան Օհանյանը: Նիստի ընթացքում քննարկվել է պաշտպանության ռազմավարական վերանայման արդյունքներն ամփոփող հանրային իրազեկման փաստաթղթի նախագիծը: Ազգային անվտանգության խորհրդի քարտուղարն իր ելույթում նշել է, որ «ՀՀ պաշտպանության ռազմավարական վերանայման արդյունքների մասին» հանրային իրազեկման փաստատթղթում պաշտպանության և ռազմական խնդիրների ներկայացումը լույս կսփռի հասարակության համար մինչ օրս ոչ այնքան հասկանալի ոլորտի խնդիրների ու հեռանկարների վրա: Պաշտպանության նախարարը գոհունակություն է հայտնել պաշտպանության ռազմավարական վերանայման գործընթացի արդյունքներից` նկատելով, որ չնայած Պաշտպանության ռազմավարական վերանայման գործընթացն իրագործվեց ընդգծված գաղտնիության պայմաններում, սակայն այսօր կարող ենք հանրային իրազեկման փաստաթղթի միջոցով ՀՀ հասարակությանը, ինչպես նաև միջազգային հանրությանն իրազեկել ՀՀ պաշտպանության համակարգում իրականացված և պլանավորված մի շարք բարեփոխումների վերաբերյալ` դրանք փոխկապակցելով սպառնալիքների և առկա կարողությունների գնահատման հետ: Կատարված աշխատանքների վերաբերյալ զեկույցով հանդես է եկել պաշտպանության նախարարի առաջին տեղակալ Դավիթ Տոնոյանը` նշելով, որ հանրային իրազեկման փաստաթուղթը, որտեղ նշված են ՀՀ ազգային անվտանգության բոլոր հնարավոր սպառնալիքները և դրանց չեզոքացման եղանակները, ցույց է տալիս, որ «պաշտպանության ռազմավարական վերանայումն ավարտելուց, դրա ընթացքում մշակված ու հաստատված ռազմավարական պլանավորման փաստաթղթերը համապատասխան միջոցներով ապահովելուց և կյանքի կոչվելուց հետո Հայաստանի Հանրապետությունը կլինի առավել անվտանգ»: Փաստաթղթում անվտանգության սպառնալիքները ձևակերպելիս հաշվի են առնվել ղարաբաղյան հակամարտության կարճաժամկետ, միջնաժամկետ և երկարաժամկետ կարգավորման կամ չկարգավորման հնարավոր տարբերակները: Համաձայն սահմանված ընթացակարգի` պաշտպանության ռազմավարական վերանայման արդյունքներն ամփոփող Հանրային իրազեկման փաստաթուղթը առաջիկայում կներկայացվի հանրության ուշադրությանը:   Ուշագրավ Նշվում է, որ հատկապես վերջին օրերին տարածված կեղծիքին պետք է պատասխանել Ըստ ադրբեջանական ԶԼՄ–ների, «համարժեք պատասխան միջոցներ են ձեռնարկվել» Վարույթ իրականացնող մարմինն այլևս չի կարծում, որ պետությանը պատճառվել է վնաս Փաշինյանը շնորհակալություն է հայտնել   Ամենաընթերցվողը բաժնում |  Վերջին լուրեր Amnesty International-ը կոչ է արել ՀՀ իշխանություններին անհապաղ հետաքննել հունիսի 12-ի բռնությունները  «Երևանում վերջին փողոցային ակցիայի ժամանակ բռնությունների մակարդակը խորը տագնապ է առաջացնում»,–ասել է կառույցի ներկայացուցիչըԲագրատ սրբազան․ Ապրում ենք իրավական ամենաթողության մեջ Նա նշել է, որ իրավապահ ամբողջ համակարգը դարձել է «իշխանության աթոռները պահող, ծառա»Հայկակ Արշամյան․ 2023–ին «Հայաստան» հիմնադրամին փոխանցումը կազմել է 7 մլրդ դրամ, 60 ծրագիր է արվել 2 նոր բազմաբնակարան շենք է կառուցվել Գյումրիում, 14 առանձնատուն՝ Լեռնագոգում, 6–ը՝ Ներքին ԽնձորեսկումԵրևանում կտեղադրվի 930 բեռնարկղ 4 տեսակի թափոնների համար Նոր թափոնամանները բավարար կլինեն ապակին, պլաստիկը, թուղթն ու այլումինը տեսակավորելու համար |
