Ստեփանակերտի օդանավակայանը թռիչքների իրականացման համար ՄԱԿ-ի հավաստագրի կարիք չունի 6 հուլիսի 2011 - 16:48 AMT PanARMENIAN.Net - Լեռնային Ղարաբաղի Հանրապետության կառավարությանն առընթեր Քաղաքացիական ավիացիայի վարչությունն առայժմ չի պատրաստվում ԱՊՀ Միջպետական ավիացիոն կոմիտե (ՄԱԿ) դիմել Ստեփանակերտի օդանավակայանի համար հավաստագիր ստանալու համար: Ինչպես PanARMENIAN.Net ի թղթակցի հետ զրույցում հայտնել է ԼՂՀ կառավարությանն առընթեր Քաղաքացիական ավիացիայի վարչության պետ Դմիտրի Ատբաշյանը, ղարաբաղյան կողմը ՄԱԿ կդիմի այն բանից հետո, երբ ավարտվեն օդանավակայանի շինարարական աշխատանքները և կազմակերպվի ներքին աուդիտը: Ադրբեջանական լրատվամիջոցների համաձայն, Ադրբեջանի Քաղաքացիական ավիացիայի պետական վարչակազմի տնօրեն Արիֆ Մամեդովը հայտնել է, որ «ՄԱԿ-ը Ստեփանակերտի օդանավակայանին հավաստագիր չի տրամադրի, իսկ եթե որոշ պետություններ թռիչքներ իրականացնեն ԼՂՀ, այդ պետությունների նկատմամբ տնտեսական պատժամիջոցներ կկիրառվեն»: «Անգամ հայկական կողմի դիմումի առկայության դեպքում օդանավակայանը հավաստագիր չի ստանա»,- ընդգծել է Մամեդովը` հայտնելով, որ Ղարաբաղ շարժվող քաղաքացիական ինքնաթիռները ոչնչացնելու` Ադրբեջանի պատրաստակամության մասին հայտարարություններն ուժի մեջ են: Ի պատասխան այդ հայտարարության, Դմիտրի Ատբաշյանը հայտնել է, որ Էրջան օդանավակայանը, որը գտնվում է չճանաչված Հյուսիսային Կիպրոսի Թուրքական Հանրապետությունում, միջազգային օդանավակայանի կարգավիճակ ունի անկախ այն բանից, որ ՀԿԹՀ-ն չճանաչված պետություն է: «Պարզ չէ, թե արդյոք այդ օդանավակայանը թռիչքների իրականացման համար համապատասխան հավաստագիր ունի միջազգային ավիացիոն կառույցներից: Եթե Էրջան օդանավակայանն ունի հավաստագիր, ապա միջազգային ավիացիոն ընկերությունը երկակի չափանիշներ կկիրառի, եթե Ստեփանակերտի օդանավակայանին հավաստագիր չտրամադրի»,- ասել է ԼՂՀ կառավարությանն առընթեր Քաղաքացիական ավիացիայի վարչության պետը: Բացի դրանից, Ատբաշյանը նկատել է, որ հավաստագիրն անհրաժեշտ է միայն այն օդանավակայաններին, որոնք միջազգային օդանավակայանի կարգավիճակ ունեն: «Մենք առայժմ չենք ձգտում միջազգային նշանակության օդանավակայան դառնալ: Այդ մասին խոսելը վաղաժամ է»,- ասել է Ատբաշյանը` Արիֆ Մամեդովին խորհուրդ տալով չսեփականացնել ՄԱԿ-ի անունից խոսելու իրավունքը: Ավելի վաղ Արիֆ Մամեդովը հայտնել է, որ Ադրբեջանը ոչնչացնելու է Ստեփանակերտի օդանավակայանում վայրէջք կատարող ինքնաթիռները: Ի պատասխան այդ հայտարարության Հայաստանի նախագահը հայտնել է, որ ինքը կդառնա Ստեփանակերտի օդանավակայան մեկնող առաջին ինքնաթիռի առաջին ուղևորը: Ստեփանակերտն իր հերթին հայտնել է, որ Ադրբեջանին չի հաջողվի վախեցնել Ղարաբաղին Ստեփանակերտի օդանավակայանում վայրէջք կատարող ինքնաթիռների ոչնչացման մասին սպառնալիքներով:
Ուշագրավ Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար
Շատերը զրկվել են տանիքից և գիշերում են փողոցում | Բագրատ սրբազանն ուղերձ է հղել. Այլընտրանք չկա` կամ այսօր, կամ երբեք Կիրանցեցիները փակել են Հայաստան–Վրաստան միջպետական ճանապարհը Միրզոյանը՝ Բուրիչին. ՀՀ–ն կառուցողական ներգրավված է տարածաշրջանային կապուղիների ապաշրջափակման քննարկումներում Միրզոյանը ստորագրել է Օվիեդոյի կոնվենցիան Իդրամ Ջունիորն ու Կորիզը գործակցության հուշագիր են կնքել Կազմակերպությունները մշակում են ֆինանսական կրթության նոր մրցույթ ԿԽՄԿ աշխատակիցներն այցելել են Բաքվում պահվող Արցախի ղեկավարներին Նրանք կապ են հաստատել ընտանիքների հետ |