Polaroid-ը թողարկել է Smart ֆոտոխցիկ-սմարթֆոն

11 հունվարի 2012 - 14:29 AMT

PanARMENIAN.Net - Polaroid ընկերությունը Լաս Վեգասում ընթացող CES 2012 Սպառողների էլեկտրոնիկայի միջազգային ցուցահանդեսի ժամանակ ցուցադրել է նոր թվային լուսանկարում կատարող Smart ֆոտոխցիկ-սմարթֆոն՝ Polaroid SC1630-ը։ Այս մասին հայտնում է bgr.com-ը։

Այն իրենից ներկայացնում է Android բջջային օպերացիոն համակարգով աշխատող թե՛ սմարթֆոն, թե՛ լուսանկարչական ապարատ։ Ֆոտոխցիկը 16Մպ է, ունի ներկառուցված 3X օպտիկական zoom, 36-108մմ ոսպնյակ, հպումով էկրան և Wi-Fi, որի միջոցով կարելի է վերբեռնել լուսանկարները սոցիալական կայքեր։ Այն լուսանկարում և տեսանկարում է HD որակի։ Polaroid SC1630 Smart ֆոտոխցիկի հենց ներսում կարելի է խմբագրել լուսանկարները, նշումներ անել (tagging)։

Polaroid SC1630 Smart ֆոտոխցիկ-հեռախոսի էկրանն ունի 3,2 անկյունագիծ։ Այն ներառում է իր մեջ Smart Album ֆունկցիան, որը լուսանկարները կարգավորում և դասակարգում է ըստ ժամանակացույցի, տեղանքի և մարդկանց (օր, վայր, մարդ)։ Նրանով հնարավոր է անգամ նշել տեղանքի կոորդինատները։ Խմբագրելու հնարավորությունն իր մեջ ներառում է մի քանի ֆունկցիա՝ կտրել, ջնջել, փոքրացնել/մեծացնել, գունային փոփոխություններ անել։

Polaroid SC1630-ն ուն միկրոSD քարտի ավելացման հնարավորություն մինչև 32 Գբ։ Այն ունի նաև ներկառուցված Bluetooth։ Polaroid SC1630 Smart ֆոտոխցիկ-սմարթֆոնի համար հասանելի է Android Market-ը, որից կարելի է ներբեռնել ավելի քան 400 000 ծրագրեր։

«Polaroid-ն արդեն 75 տարի է օգնում է ստեղծել մարդկանց կյանքի պատմությունը լուսանկարներով»,-նշել է Polaroid-ի նախագահ Սքոթ Հարդին։

CES 2012 (Սպառողների էլեկտրոնիկայի ցուցադրություն) միջազգային ցուցահանդեսը անցկացվում է հունվարի 10-13-ը ԱՄՆ-ի Լաս Վեգաս քաղաքում։ Ցուցահանդեսի նախնական ցուցադրությունները մեկնարկել են հունվարի 5-ին։ Ցուցահանդեսին կներկայանան ընկերություններ ավելի քան 140 երկրներից։