ՀԿԵ-ն իրականացնում է Երևանի մանկական երկաթուղու վերանորոգումը

ՀԿԵ-ն իրականացնում է Երևանի մանկական երկաթուղու վերանորոգումը

PanARMENIAN.Net - «Հարավկովկասյան երկաթուղի» ՓԲԸ նախաձեռնությամբ՝ վերանորոգման աշխատանքներ են անցկացվում Երևանի մանկական երկաթուղում: Այսպիսով, ՀԿԵ-ն, լինելով սոցիալական ուղղվածություն ունեցող ընկերություն, իր վրա է վերցրել մանուկների անվտանգ և հարմարավետ հանգսի կազմակերպման ու այս հայտնի ժամանցի գոտու վերականգնման պարտավորությունները, ասվում է ընկերության հաղորդագրության մեջ:

Վերանորոգումը նաև հանդիսանում է քաղաքային ենթակառուցվածքի զարգազման խթանման ուղղություններից մեկը, որն ընթանում է 2011 թվականին Ընկերության և Երևանի քաղաքապետարանի միջև ստորագրված սոցիալ-տնտեսական համագործակցության մասին համաձայնագրի շրջանակներում:

Վերականգնողական աշխատանքները Մանկական երկաթուղում անցկացվում են 2 փուլով: Առաջին փուլում իրականացվում են կայարանների, շարժակազմի և գծերի վերանորոգման և արդիականացման աշխատանքները, երկաթուղու անվտանգության ապահովման միջոցառումները: Մասնավորապես, ՀԿԵ-ի մասնագետները վերանորոգեցին Մանկական երկաթուղում շահագործվող շոգեքարշն ու ջերմաքարշը, երեք ամառային վագոնները: Նաև իրականացվում է երկաթուղու 1,2 կմ գծերի վերանորոգումը, մոտակա տարածքների բարեկարգումը:

Ծրագրի առաջին փուլը կավարտվի մինչև Երկաթուղայինների օրը, որն այս տարի նշվում է օգոստոսի 5-ին: Երկրորդ փուլի շրջանակներում արդեն սեփականատիրոջ ուժերով վերանորոգվելու է Մանկական երկաթուղու կայարանի շենքը: Ներկա պահին մշակվում է մանկական ուսումնական կենտրոնի ստեղծման հայեցակարգ, որտեղ մանուկները կծանոթանան երկաթուղային մասնագիտությունների առանձնահատկություններին, երկաթուղային տեխնոլոգիային և այլ հարցերի:

Երևանում մանկական երկաթուղին բացվել է 1937 թվականի հունիսի 9-ին: Երկաթուղում գործում է 2 կայարան (Հայրենիք և Պիոներական), 1 կառամատույց (Ուրախություն) և 45 մետր երկարություն ունեցող մեկ թունել:

 Ուշագրավ
Հավաքի նպատակն է քննարկել ու բարձրաձայնել Արցախի ժողովրդի առաջարկներն ու պահանջները
Առաջարկվում է նաև տուգանային միավոր սահմանել նաև լուսաթափանցելիության կանոնի խախտման համար
Ամփոփվել են միասնական քննությունների առաջին փուլի արդյունքները
Հաջորդ հումանիտար բեռը նախատեսվում է տրամադրել Խարկովի հիվանդանոցներից մեկին
---