Աշխարհի ամենաառողջ երկրների վարկանիշում Հայաստանը զբաղեցնում է 79-րդ տեղը

PanARMENIAN.Net - Ամերիկյան Bloomberg ֆինանսատնտեսության տեղեկատվության գործակալությունը ներկայացրել է աշխարհի երկրների վարկանիշն ըստ դրանց բնակիչների առողջական վիճակի (The World’s Healthiest Countries 2012):

Վարկանիշը կազմվել է Bloomberg գործակալության վերլուծաբանների կողմից Առողջապահության համաշխարհային կազմակերպության, ՄԱԿ-ի և Համաշխարհային բանկի տվյալների հիամն վրա: Երկրներից յուրաքանչյուրի համար, որի բնակչությունը գերազանցում է մեկ միլիոնը (145 պետություն), մշակվել են երկու համալիր ցուցանիշներ` առողջության ընդհանուր ինդեքս և առողջության համար ռիսկերի ինդեքս:

Առաջին ցուցանիշը հաշվի է առել առողջության այնպիսի ցուցանիշներ, ինչպիսիք են ծնվելիս կյանքի տևականությունը, նորածինների մահացությունը, բնակչության մահացությունն ըստ երեք տարիքային խմբերի (մինչև 14 տ, 15-65 տ և ավելի մեծ), ինչպես նաև մինչև 65 տարեկան ապրածների թիվը:

Երկրորդ ցուցանիշը հաշվի է առել առողջության համար ռիսկերի տարբեր գործոնները, այդ թվում ծխախոտի և ալկոհոլի օգտագործման մակարդակը, ֆիզիկապես ոչ ակտիվ բնակչության տոկոսը, ավելորդ քաշ ուենցող բնակչության տոկոսը և այլն: Բացի դրանից, հաշվի են առնվել բնապահպանական ցուցանիշներ, բնակիչների շարքում ՁԻԱՀ վարակակիրների թիվը, մայրական մահացության ռիսկը և այլն:

Հետազոտության արդյունքներով պարզվել է, որ աշխարհի ամենաառողջ երկիրը Սինգապուրն է, որը հավաքել է 89.45 միավոր, նրանից մի քիչ ետ են մնում Իտալիան, Ավստրալիան, Շվեյցարիան և Ճապոնիան: Առաջատարների տասնյակի մեջ են մտել նաև Իսրայելը, Իսպանիան, Նիդերլանդները, Շվեդիան և Գերմանիան: Ֆրանսիան 13-րդ տեղում է, Մեծ Բրիտանիան` 21, ԱՄՆ-ը` 33, Չինաստանը` 55, Հնդկաստանը` 103:

Նախկին ԽՍՀՄ երկրներից ամենաբարձր տեղը զբաղեցրել է Էստոնիան` 57, Վրաստանը` 77, Հայաստանը և Լիտվան` 79, Լատվիան` 81, Ադրբեջանը` 87, Ռուսաստանը` 97:

Վարկանիշը եզրափակում են աֆրիկյան երկրները` Մոզամբիկ, Չադ, Կոնգո, Լեսոտո և Սվազիլենդ: