ԿԽՄԿ-ն այցելել է Բաքվի հայ գերիներին, այդ թվում` Արսեն Խոջոյանին

PanARMENIAN.Net - Կարմիր Խաչի միջազգային կոմիտեի Բաքվի գրասենյակի ներկայացուցիչները մարտի 12-ին այցելել են Ադրբեջանում գտնվող ՀՀ 7 քաղաքացիներին` ռազմագերի Հակոբ Ինջիղուլյանին, ինչպես նաև` Արսեն Խոջոյանին ու 5 անդամից բաղկացած հայկական ընտանիքին: Տեսակցման ընթացքում տեղի է ունեցել ընտանեկան բովանդակությամբ նամակների փոխանակում: PanARMENIAN.Net ի հետ զրույցում Կարմիր Խաչի միջազգային կոմիտեի (ԿԽՄԿ) հայաստանյան պատվիրակության հաղորդակցման ծրագրերի պատասխանատու Զառա Ամատունին նշեց, որ տեսակցությունների պարբերականությունն ապահովելու համար բանակցությունները շարունակվում են:

Մարտի 7-ին ադրբեջանական լրատվականներում տեղեկություն էր տարածվել, որ «Թովուզի շրջանում, երկաթգծի մոտակայքում» հայ-ադրբեջանական սահմանը հատելիս ՀՀ ևս մեկ քաղաքացի է ձերբակալել։ APA գործակալությանը երկրի Ռազմագերիների, պատանդների ու անհետ կորածների վարչության պետհանձնաժողովի նախագահ Շահին Սաիլովն ասել էր, որ Հայաստանի քաղաքացին 20-22 տարեկան է։ Նրա խոսքով, ձերբակալվածին, ով հայերենից բացի այլ լեզու չգիտի, տեղափոխում են Բաքու։ Ավելի ուշ ադրբեջանական լրատվականները սկսեցին գրել, որ ձերբակալվածը 1991-ին ծնված Արսեն Խոջոյանն է։

Վերին Կարմիրաղբյուրի գյուղապետը տեղեկացրել էր, որ գյուղում այդ անուն ազգանունով երիտասարդ է բնակվում, որի գտնվելու վայրն այժմ անհայտ է։ Նա հունվարի 28-ին Հայաստանի սահմանը հատած Մամիկոն Խոջոյանի բարեկամն է, ում ադրբեջանական իշխանությունները Կարմիր խաչի միջնորդությամբ մարտի 4-ին վերադարձրել էին: Ըստ շրջանառվող տարբերակներից մեկի, երիտասարդն ուժեղ մառախուղի պատճառով մոլորվել էր։Հունվարի 28-ին ադրբեջանական ԶԼՄ-ները հայտնել էին «Ադրբեջանի Թովուզի շրջանում ձերբակալված հայկական դիվերսիոն խմբի զինված ուղեկցորդի» մասին։

Պարզվել էր, որ քաղաքացին Վերին Կարմիրաղբյուրի 77-ամյա բնակիչ Մամիկոն Խոջոյանն է, որին վերջին անգամ տեսել էին հունվարի 28-ին՝ 14:00-15:00-ն ընկած հատվածում: Ոստիկանության փոխանցմամբ, ծերունին ապրում էր միայնակ, հոգեկան առողջության հետ կապված խնդիրներ ունի, վերջին 2-3 տարիներին բժիշկների հսկողության տակ էր: Հովիվներից մեկը նկատել էր Խոջոյանին Մաֆլար կոչվող վայրում, սահմանից մոտ 2 կմ հեռավորությամբ: Նա ասել էր, թե գնում է մորի հավաքելու, դրանից հետո նրան ոչ ոք չի տեսել:

Մարտի 4-ի երեկոյան ՊՆ-ն հաղորդագրություն էր տարածել, որտեղ ասվում էր, թե մեկ ամսից ավելի գերության մեջ մնալուց հետո հոգեկան հիվանդությամբ տառապող Մամիկոն Խոջոյանը ՀՀ իշխանությունների խնամքին է հանձնվել առողջական լուրջ խնդիրներով: Հայրենադարձվելուց հետո Խոջոյանը տեղափոխվել էր Իջևանի բժշկակական կենտրոն, որտեղ անցկացված հետազոտությամբ նրա մարմնին բազմաթիվ կապտուկներ, կոտրվածքներ և վնասվածքներ են հայտնաբերվել:

Վնասվածքների ու կոտրվածքների մասին ադրբեջանական լրատվականներում ավելի վաղ խոսք անգամ չէր եղել, ինչը վկայում է, որ դրանք ձեռք են բերվել գերությունում գտնվելու ժամանակ։

Մարտի 7-ին ծերունուն Իջևանի հիվանդանոցից բերել էին Երևան՝ «Գրիգոր Լուսավորիչ» ԲԿ-ի վերակենդանացման բաժանումնք։ Մարտի 10-ին հայտնի է դարձել, որ Խոջոյանն արդեն վնասվածքաբանության բաժանմունքում է: Ինչպես ասել է վերակենդանացման բաժանմունքի վարիչ Լևոն Օռլովը, ի տարբերություն սկզբնական շրջանի նա արդեն շփվում է հարազատների հետ, ինչպես նաև պատասխանում բժիշկների հարցերին Իսկ կվիրահատեն արդյոք Խոջոյանին, թե՝ ոչ, կորոշեն վնասվածքաբանները:

Բժշկական կենտրոն հիվանդին տեղափոխելուց անմիջապես հետո կազմվել էր հետազոտման պլան: Կատարվել էին կրծքի, կոնքի, աջ բազկի և նախաբազկի ռենտգեն քննություններ, որովայնի սոնոգրաֆիա, արյան անհրաժեշտ բոլոր հետազոտությունները, ինչպես նաև գլխի համակարգչային շերտագրում: