Աղբյուր. ՀՀ ինտերնետի 85%-ը կարող է հայտնվել Ադրբեջանի վերահսկողության տակ

2 սեպտեմբերի 2015 - 14:00 AMT

PanARMENIAN.Net - Ադրբեջանի առաջատար ինտերնետ պրովայդեր «Ազերօնլայնը» հետաքրքրված է Վրաստանի խոշորագույն Caucasus Online ինտերնետ պրովայդերի 1200 կմ օպտիկամանրաթելային մալուխի գնմամբ: Այս մասին գրում է վրացական «Կվիրիս պալիտրա» թերթը` սեփական աղբյուրների վրա հղումով:

Ըստ թերթի, Caucasus Online ընկերությունն անցկացրել է կաբելը 2008 թ. Սև ծովի հատակով: Այն ամենակարճ ճանապարհով հասցնում է ինտերնետը Եվրոպայից Անդրկովկասի երկրներ: Այս մալուխն ապահովում է Հայաստանի ինտերնետի 85%-ը, Ադրբեջանի ինտերնետի 50%-ը և Վրաստանի պահանջարկի 55%-ը:

«Այսպիսով, Ադրբեջանի շահագրգռվածությունն այս հարցում զարմանալի չէ` ամբողջական ծանրաբեռնվածության դեպքում կաբելը կարող է բավականին մեծ եկամուտ բերել: Պակաս կարևոր չէ, որ Հայաստանի ինտերնետի 85%-ը կախված կլինի Ադրբեջանից, որը կկարողանա վերահսկել նրա տեղեկատվության այդ ծավալը»,-գրում է Dalma news գործակալությունը:

«Ազերօնլայնը» կապված է Ադրբեջանի նախագահ Իլհամ Ալիևի ընտանիքի հետ, հետևաբար, ինչպես պնդում է «Կվիրիս պալիտրան», կաբելը գնելու Ադրբեջանի շահագրգռվածությունն ունի նաև քաղաքական դրդապատճառներ, հայտնում է bizzone.info-ն:

2013-ի ապրիլին հայկական առաջատար հեռահաղորդակցային Ucom ընկերությունն ու վրացական Caucasus Online-ը պայմանագիր կնքեցին, որի համաձայն վրացական ընկերությունը պարտավորվեց մինչև 40 գիգաբիթ թողունակությամբ ինտերնետ մատակարարել հարևան երկրներին Ucom-ի օպտիկամալուխային ցանցով: «Նման համագործակցությունը հնարավորություն է ստեղծում, որպեսզի Հայաստանի միջոցով ինտերնետ մատակարարվի այլ երկրներ: Այս համատեղ նախագծի իրականացումը հնարավոր է դառնում Ucom ընկերության կառուցած գերհզոր օպտիկամանրաթելային ցանցի շնորհիվ: Այսպիսով մեծանում է Հայաստանի դերը Եվրոպայից դեպի Մերձավոր և Միջին Արևելք ինտերնետի մատակարարման գործընթացում, քանզի Հայաստանը դառնում է կապող օղակ վերջիններիս միջև»,-ասվում է Ucom ընկերության մամուլի ծառայության հաղորդագրության մեջ:

Հղումներ թեմայով.

Bizzone.info. Интернет в Армении может попасть под контроль Азербайджана