Կուստուրիցան՝ Երևանում. Թուրքիայում չեն ողջունում Ցեղասպանության վերաբերյալ իմ դիրքորոշումը25 դեկտեմբերի 2015 - 14:53 AMT PanARMENIAN.Net - Հայտնի սերբ կինոռեժիսոր, երաժիշտ ու դերասան Էմիր Կուստուրիցան Երևանում է և դեկտեմբերի 25-ին The No Smoking Orchestra ֆոլք-ռոք խմբի հետ հանդես է գալու համերգով: Կուստուրիցան The No Smoking Orchestra-ի բաս կիթառահարն է: Նա արդեն 2-րդ անգամ խմբի հետ համերգով հանդես կգա Երևանում: «Ինձ համար մեծ հաճույք է լինել մի երկրում, որի հետ մենք շատ նմանություններ ունենք: Մի մեծ տարբերություն կա, դուք՝ հայերդ, շատ համախմբված եք, ունեք պետականություն, որը ձեր հավաքական արձագանքն է արտահայտում Ցեղասպանության վերաբերյալ: Իմ ազգը, որը պարբերաբար գրոհների է ենթարկվել, միասնական հանդես չի գալիս: Ուստի, ամեն անգամ այս երկիր եմ գալիս՝ զգում եմ, որ դուք միասնական ու համախմբված եք»,- լրագրողներին ասել է Էմիր Կուստուրիցան: Նա պատմել է, որ Երբ 3-4 տարի առաջ Թուրքիայում էր, այնտեղ չէին ողջունում ցեղասպանության վերաբերյալ նրա դիրքորոշումը, գրում է Tert.am-ը: «Ես էլ ասացի, որ դուք չէ, որ պետք է ինձ ասեք, թե ինչ դիրքորոշում ունենամ, քանի որ 20-րդ դարի սկզբին դուք էիք, որ միլիոնուկես հայերի ցեղասպանության ենթարկեցիք», - ասել է ռեժիսորը: Կուստուրիցան նաև պատմել է, որ երբ հեռացել է այդ երկրից, իրեն ասել են, թե Թուրքիայում այդ օրերին ծեծի են ենթարկել մի շվեցարացի կինոռեժիսորի, ով նման է եղել իրեն: Խոսելով Եվրոպայի միգրացիոն ճգնաժամի ու քրիստոնյաների նկատմամբ իրականացվող հալածանքների մասին՝ ռեժիսորը ասել է. «Իմ կանխատեսումն այն է, որ մենք` քրիստոնյաներս ոչնչացման շեմին ենք կանգնած: Քրիստոնեության վատ վիճակի մասին է վկայում ներկայիս Եվրոպան, քրիստոնեությունն ուղղակի կտտանքների է ենթարկվում: Այստեղ պարբերաբար մուսուլմանական երկրներից ներգաղթյալներ են գալիս: Ես, իհարկե, փախստականների դեմ ոչինչ չունեմ, բայց մշտապես ինքս ինձ հարց եմ տալիս` ինչու փախստականները ուղղակի չեն գնում Սաուդյան Արաբիա, որը ամենահարուստ երկրներից մեկն է, այլ գալիս են Եվրոպա` կտրել-անցնելով ավելի երկար ճանապարհ: Ֆրանսիացի շատ հայտնի մի մտավորականներից մեկն այդ հարցիս պատասխանեց` նրանք կարիք ունեն տարեկան մեկ մլն մարդ Եվրոպա ուղարկել, որպեսզի Եվրոպան կորցնի իր ինքնությունը: Երբ ես կնքվեցի, դարձա քրիստոնյա (Կուստուրիցան ծնվել է մուսուլման ընտանիքում և միայն մի քանի տարի առաջ կրոնափոխ է եղել՝ դառնալով ուղղափառ քրիստոնյա), այդ ժամանակ քրիստոնեության վատ շրջանն էր, բայց քանի որ ես հավատում եմ արվեստին, ես նաև հավատում եմ Աստծուն», մեջբերում է Panorama.am-ը: Սերբ կինոռեժիսորը բազմիցս նշել է, որ Հայաստանն ու Սերբիան իրար շատ նման են ինչպես քաղաքական դիրքով, այնպես էլ մշակույթով և պատմությամբ: Երկու ազգն էլ ցեղասպանություն են տեսել, իսկ երբ 5 տարի առաջ Կուստուրիցային հրավիրեցին մասնակցելու Անթալիայի «Ոսկե նարինջ» միջազգային կինոփառատոնին, Թուրքիայի քաղաքական գործիչներն ու արվեստագետները կոշտ քննադատություններ հնչեցրին՝ մեղադրելով նրան բոսնիական պատերազմի ժամանակ մահմեդականների զանգվածային կոտորածն արդարացնելու մեջ: Կուստուրիցան իր հերթին որոշեց լքել փառատոնը՝ հայտարարելով. «Եթե ցեղասպանությունների նկատմամբ այդպես զգացմունքային եք, ինչո՞ւ չեք խոսում Առաջին աշխարհամարտի տարիներին հայերի դեմ իրականացված Ցեղասպանության մասին»: Էմիր Կուստուրիցան հարավսլավացի և սերբ կինոռեժիսոր է, Եվրոպայի խոշորագույն կինոփառատոների մրցանակակիր, որը Կաննի կինոփառատոնի երկու «Ոսկե արմավենու» էարժանացել, Պատվավոր լեգիոնի շքանշանակիր է, Սերբիայի Հանրապետության գիտությունների և արվեստի ակադեմիայի օտարերկրացի անդամ։ Ուշագրավ Նրանք ձերբակալվել են խուլիգանական արարքների կատարման մեջ մասնակցության կասկածանքով Փաշազադեն հայտարարել էր, թե «հայկական եկեղեցին, ռևանշիզմ է քարոզում” Հավաքի նպատակն է քննարկել ու բարձրաձայնել Արցախի ժողովրդի առաջարկներն ու պահանջները Առաջարկվում է նաև տուգանային միավոր սահմանել նաև լուսաթափանցելիության կանոնի խախտման համար Ամենաընթերցվողը բաժնում | Ալիև․ Հայաստանը պետք է փոխի Սահմանադրությունը, հրաժարվի Արարատ լեռը որպես խորհրդանիշ օգտագործելուց Ալիևը նաև ասել է, թե «հայերը լուրջ հոգեբանական շեղումներ ունեն» և «զառանցագին գաղափարներ» Ալիև․ Ձեռքերս ծալած չենք սպասելու, մինչև Ֆրանսիան, Հնդկաստանն ու Հունաստանը զինեն ՀՀ–ին «Դրանով փորձում են մեզ ինչ–որ բան ապացուցել»,–ասել է նա Վենետիկում անցկացվող 60-րդ միջազգային բիենալեի օրերին բացվել է AKNEYE ֆիջիթալ սփեյսը Ներկաները վայելել են միջոցառումը, ծանոթացել NFT-ների յուրօրինակ աշխարհին և ձեռք բերել նոր ծանոթություններ Ալիևը կրկին Զանգեզուրի միջանցք է պահանջում․ «ՀՀ–ն չի կարող հրաժարվել եռակողմ հայտարարության այդ դրույթից» «Այնտեղ գրված է, որ պետք է տրանսպորտային հաղորդակցություն լինի, որը հսկելու են ՌԴ սահմանապահները»,–ասել է նա |