ԱԺ նախագահ․ Դրական եմ վերաբերվում, եթե ՀՀ–ն գազ գնի Ադրբեջանից

PanARMENIAN.Net - ՀՀ ազգային ժողովի նախագահ Ալեն Սիմոնյանը դրական է համարում, եթե ՀՀ–ն կարողանա գազ գնել Ադրբեջանից։

«Շատ լավ, դրական եմ վերաբերվում, եթե ՀՀ–ն գազ գնի Ադրբեջանից։ Կարծում եմ մենք պետք է քննարկենք այդ հարցը։ Նենց չի, որ հիմա մեր օգտագործած գազի մի մասն ադրբեջանական չէ։ Վստահ եմ այն պայմանագրով, որ Ռուսաստանից գալիս, մտնում է իրենց մոտ ու գնում Եվրոպա, մեծ հաշվով` նույն գազն է գալիս ու մտնում մեզ մոտ։ Շա՜տ լավ տարբերակ է ոչ միայն Ադրբեջանից, այլև Պարսկաստանից գազամուղ անցկացնելը և գազ գնելը»,– նշել է Սիմոնյանը, հայտնում է Sputnik Արմենիան։

Անդրադառնալով Տավուշում սահմանազատման խնդիրներին՝ նա ասել է, որ սահմանային սյուն տեղադրելը նշանակում է, որ Հայաստանն ու Ադրբեջանն իրարից տարածքային պահանջներ չունեն։

«Ես անկեղծ շատ ուրախ եմ, որ մենք եկել հասել ենք նրան, որ մենք արդեն սյուներ ենք տնկում և ունենք սահման։ Չէ՞ որ սահմանը ֆիքսվում է ոչ միայն հայկական կողմի համար, այլև ադրբեջանական կողմի համար»,- ասել է նա։

Ապրիլի 19–ի երեկոյան հայտարարվեց, որ Հայաստանը համաձայնել է վերադարձնել Տավուշի հատվածում Ադրբեջանի պահանջած գյուղերը՝ դրա դիմաց չստանալով Բերքաբերի դիմաց գտնվող հայկական տարածքները, որոնք այժմ Ադրբեջանի վերահսկողության տակ են։ Իսկ Ոսկեպարին հարակից միջպետական ճանապարհի հատվածը այս փուլում չի սահմանազատվի, այսինքն՝ կմնա հայկական վերահսկողության տակ։ Բաքվի և Երևանի համատեղ հայտարարությունից չորս օր անց Հայաստան-Ադրբեջան սահմանին տեղադրվեց առաջին սահմանային սյունը։

Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը: