Կիեւում կանգնեցվելու է Հայոց ցեղասպանության զոհերի հիշատակը հավերժացնող հուշարձան

25 փետրվարի 2010 - 16:41 AMT

PanARMENIAN.Net -
Կիեւի Գոլոսեեւյան շրջանի շրջանային խորհուրդը քննարկել է Հայոց ցեղասպանության 95-րդ տարելիցին նվիրված հուշակոթողի կառուցման մասին առաջարկը, որը ներկայացրել էր շրջանի հայկական համայնքը: Որոշում է ընդունվել մայրաքաղաքի Օդեսայի հրապարակում տեղ հատկացնել հուշակոթողի համար:

Analitika.at.ua գործակալության թղթակցի հետ հարցազրույցի ընթացքում շրջանային խորհրդի պատգամավոր, Ուկրաինայում հայերի ազգային կոնգրեսի փոխնախագահ, Գոլոսեեւյան շրջանի հայկական համայնքի ղեկավար Արթուր Մարտիրոսյանը հայտարարել է, որ դա Ուկրաինայի հայկական համայնքի եւ ողջ հայ ժողովրդի համար մեծ իրադարձություն է: Պատգամավորը վստահ է, որ Հայոց ցեղասպանության զոհերի հիշատակի հուշարձանը ժամանակի ընթացքում կդառնա Կիեւի հայերի, ինչպես նաեւ հայազգի հյուրերի համախմբման եւ այցելությունների վայրը: Մարտիրոսյանը շնորհակալություն է հայտնել բոլոր այն պատգամավորներին, ովքեր աջակցել են այդ հարցում:

Շրջանային խորհրդի պատգամավոր Անատոլի Սուլդինն իր հերթին նշել է, Գոլոսեեւյան շրջանի հայկական համայնքի բեղմնավոր աշխատանքը` հույս հայտնելով, որ հետագայում էլ ավելի կամրապնդվի եւ կզարգանա հայ-ուկրաինական բարեկամությունը: Նա նաեւ հույս է հայտնել, որ հայ ժողովուրդը անտարբերության չի մատնի Գոլոդոմորի ճանաչումը:

Ուկրաինայի հայերի ազգային կոնգրեսի նախագահ Աշոտ Ավանեսյանը հայտնել է, որ ապրիլի 24-ին այն տեղում, որտեղ կանգնեցվելու է հուշարձանը, նախատեսվում է տեղադրել Հայաստանից բերված հող, հուշաքար եւ խաչ: Հուշակոթողը նախատեսված է քանդակել եւ տեղադրել այս տարվա ընթացքում:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: