Ղրիմում սկսվել են Հայոց ցեղասպանությանը նվիրված միջոցառումները

17 ապրիլի 2010 - 10:48 AMT

PanARMENIAN.Net - Ղրիմում սկսվել են Հայոց ցեղասպանությանը նվիրված միջոցառումներ: Ապրիլի 15-ին Ղրիմի ազգագրական թանգարանում բացվել է Ղրիմի հայ նկարիչների ցուցահանդեսը: Ինչպես հայտնում է Analitika.at.ua-ն, ապրիլի 18-ին հայկական համայնքը և Ղրիմի հայ երիտասարդության կոմիտեն Սիմֆերոպոլում անցկացնելու են “Հայոց ցեղասպանություն. առանց մոռացության իրավունքի” կլոր սեղանը` նվիրված Օսմանյան կայսրությունում Հայոց ցեղասպանության 95-ամյա տարելիցին: Հանդիպումը տեղի է ունենալու Ռուսական մշակութային կենտրոնում (ՌՄԿ):

“Ղրիմ” պետական հեռուստառադիոընկերության ուղիղ եթերում լինելու է հեռուստահաղորդում հայկական, բուլղարական, հունական և գերմանական համայնքների ներկայացուցիչների և մասնագետների մասնակցությամբ:

Ապրիլի 23-ին հայկական համայնքը Ղրիմի հայ երիտասարդության կոմիտեի և “Մայրիկ” լիգայի մասնակցությամբ կազմակերպում է “Վառիր հիշողության մոմը” ակցիան

Ապրիլի 24-ին Ղրիմի հայերը սգո երթ են անցկացնելու Սիմֆերոպոլի կենտրոնական փողոցներով, իսկ Հին հայկական գերեզմանոցում Սբ. Հակոբ եկեղեցու մոտ մատուցվելու է Հայոց ցեղասպանության զոհերի հոգեհանգստի պատարագ և տեղի է ունենալու սգո ցույց:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: