Հայաստանում կոշիկի արտադրության և իրացման ոլորտը գտնվում է պետական վերահսկողությունից դուրս: Կոշիկի շուկայում արտադրանքի մեծ մասը ներկրված է, իսկ տեղի կոշիկ արտադրողները հիմնականում աշխատում են ընդհատակյա, առանց գրանցման: Ամեն օր Հայաստան են ներկրվում կոշիկի չինական, թուրքական, կորեական արտադրության հսկայական ծավալներ, և սահմանին ոչ ոք չի ստուգում, թե ինչ կաշվից է կարված կոշիկը՝ բնական, թե արհեստական: Ներկրողները կարող են բերել թունավոր նյութերից կարված կոշիկ՝ ուղղակի չիմանալով այդ մասին և անարգել վաճառել այն Հայաստանում:

Սեպտեմբերի 30-ից հոկտեմբերի 8-ը Հայ ազգային կոնգրեսը (ՀԱԿ) Ազատության հրապարակում անցկացրեց շուրջօրյա հանրահավաքներ: Արդեն մեկ շաբաթ է, ինչ ՀԱԿ-ը դադարեցրել է հանրահավաքները, բայց մինչև հիմա պարզ չէ, թե իրականում ինչի էր ցանկանում հասնել այդ հանրահավաքներով ՀԱԿ-ը և ի վերջո ինչի հասավ: Հայտնի հեքիաթի հերոսի նման ՀԱԿ-ը հեռացավ հրապարակից, բայց խոստացավ վերադանալ: Բայց, ի տարբերություն Կառլսոնի, նա ցանկանում է վերադառնալ ոչ մենակ, այլ իր կողմնակիցների մեծ թվով, որպեսզի, վերջապես, հասնի իր գլխավոր պահանջին՝ նախագահ Սերժ Սարգսյանի հրաժարականին և արտահերթ նախագահական ընտրություններին: