Երեւանում բացվել է տիեզերական մոնիտորինգի կենտրոն

PanARMENIAN.Net - ՀՀ վարչապետ Տիգրան Սարգսյանն այսօր, ՀՀ պաշտպանության, էկոնոմիկայի, արտակարգ իրավիճակների նախարարների, ՀՀ ԿԱ անշարժ գույքի կադաստրի պետական կոմիտեի նախագահի, ՀՀ ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահի ուղեկցությամբ, այցելել է Անշարժ գույքի կադաստրի պետական կոմիտեին առընթեր «Գեոդեզիայի եւ քարտեզագրության կենտրոն», մասնակցել տիեզերական ընդունիչ կայանի գործարկմանը։ Վարչապետը նաեւ շրջել է կենտրոնի աշխատասենյակներում, ծանոթացել աշխատանքային պայմաններին, զրուցել աշխատակիցների հետ։ Այդ մասին հաղորդել են ՀՀ կառավարության տեղեկատվական ծառայությունից:



Ընդունիչ կայանի ստեղծման նպատակը Հայաստանի տարածքի վերաբերյալ ճշգրիտ տվյալների ստացումն է` տիեզերական տեխնոլոգիաների կիրառմամբ։ Կայանը հնարավորություն է ընձեռնում օգտվել երկրամերձ ուղեծրով (մինչեւ 1000 կմ) արհեստական արբանյակների հնարավորություններից եւ կատարել Երկրի հեռահար զոնդավորում, որի տվյալները կօգտագործվեն հանրապետության գեոդեզիայի, քարտեզագրության, ինչպես նաեւ անվտանգության ու տնտեսության հետ կապված խնդիրները լուծելիս։