Արմեն Նազարյան.Եթե մեզանից մեկը մեդալ է նվաճում` այն բոլորինս է 4 հուլիսի 2012 PanARMENIAN.Net - Ձյուդոյի Եվրոպայի հայ առաջին չեմպիոն Արմեն Նազարյանի համար այս Օլիմպիական խաղերը կլինեն երրորդը: PanARMENIAN.Net-ի հետ զրույցում նա պատմել է, թե ինչու չէր ծնողներին տեղյակ պահել, որ ձյուդո է պարապում, ինչու է փոխել քաշային կարգը և ինչ պետք է անի, որպեսզի կարողանա նվաճել Օլիմպիական մեդալ: Արմե'ն, դու առաջին հայ ձյուդոիստն ես, որին հաջողվել է դառնալ Եվրոպայի չեմպիոն: Ի՞նչ է դա քեզ համար և ինչպե՞ս ես վերաբերվում այդ փաստին: 2005-ին դարձա Եվրոպայի չեմպիոն, այդ հաջողությունը ինձ տրվեց տարիների աշխատանքի և ստաբիլ մարզումների շնորհիվ: Լինել առաջին հայ չեմպիոնը պարտավորեցնող է: Ես շատ եմ ցանկանում, որ փոքր երեխաները շարունակեն իմ հաջողությունները ու նաև գերազանցեն ինձ: Այդքան շատ տիտղոսներ ես նվաճել թե աշխարհի և թե Եվրոպայի առաջնություններում: Ինչի՞ հաշվին ես կարողացել այդ ամենին հասնել: Դժվարություններ շատ են եղել: Մեր մարզաձևը շատ զարգացած է, ու ամեն քաշային կարգում 80 ավելի մարզիկներ են մասնակցում: Մրցակցությունը մեծ է, ու առաջին եռյակում տեղ գտնելու համար շատ դժվարությունների ես հանդիպում: Բայց ասեմ, որ եթե մարզիկն ունի նպատակ, ապա կարողանում է հաղթահարել ցանկացած դժվարություն: Դու սկզբում հանդես ես եկել 60 կգ քաշային կարգում, ապա տեղափոխվել ես 66: Ինչո՞վ էր դա պայմանավորված: Սա զուտ քաշիս հետ էր կապված: Ես ամեն մրցաշարից առաջ 5-6 կիլոգրամ քաշ էի գցում ու դրա հետ էլ այդպես վարվեցի: Տեղափոխվելով մի քաշ բարձր` տարբեր խնդիրներ առաջացան: Փոխվեցին մրցակիցներս, մենամարտելու ձևը, ու կարծես ամեն ինչ նորից սկսած լինեի: Ինձնից պահանջվեց երկու տարի, որ լրիվ հարմարվեմ այս քաշում ու կրկին մեդալներ նվաճեմ:
Արմեն, ձյուդոն արագ մարզաձև է և վայրկյանն էլ կարող է որոշիչ լինել: Ինչպե՞ս է ձյուդոիստը կարողանում մտնել տատամի և հաղթել: Իսկապես, մի քանի վայրկյանում պետք է կողմնորոշվես ու մտնես մարտի մեջ: Քեզնից է կախված մենամարտի ելքը, դրա համար պետք է տրամադրվել ու առաջին իսկ վայրկյանից պատրաստ մենամարտել: Քեզ համար ի՞նչն է ամենաբարդը ձյուդոյում: Մարզումները: Մրցումներն ավելի հեշտ են լինում ինձ համար: Ամեն մարզիկ ունի մենամարտելու իր ոճը: Ո՞րն է քո նախընտրած հնարքը և ոճդ ինչպիսի՞ն է: Ինչպես բոլորը` ես էլ ունեմ: Բայց բառերով չեմ կարող նկարագրել, պետք է ուղղակի տեսնեն մարդիկ, որ պատկերացում ունենան: Ձյուդոն մի տեսակ «պատկանում» է ճապոնացիներին, և վերջիններս են համարվում մեդալների հիմնական հավակնորդներ: Ինչպե՞ս կմեկնաբանես այս տեսակետը և ինչպե՞ս ես կարողանում դիմակայել ու շատ հաճախ նաև հաղթել նրանց: Մարզաձևը ճապոնական է, բայց չէի ասի, որ այն պատկանում է նրանց, քանի որ ձյուդոյով ամբողջ աշխարհում են զբաղվում ու հասնում են հաջողությունների: Մենք էլ հանդիպում ենք նրանց ու շատ հաճախ հաղթում ենք: Գիտեք, երևի մեր Հայաստանի բնակլիմայական պայմաններն են ստիպում լինել կռվող ու պայքարող, դա է նաև պատճառը, որ կարողանում ենք հաղթել:
Հե՞շտ է լինել տիտղոսակիր մարզիկ: Այո: Դժվարն այն է, որ այդ տիտղոսները պետք է կարողանաս պահել: Ո՞րն է եղել քո ամենաանմոռանալի մենամարտը: 2006-ի աշխարհի Գավաթի ժամանակ, երբ ես մենամարտեցի Օլիմպիական եռակի չեմպիոնի հետ: Մենամարտը հավասար էր ընթանում, բայց ես մեկ միավորով պարտվեցի: Արմե'ն, դու երկար տարիներ հանդես ես գալիս Հայաստանի հավաքականի կազմում: Այս ընթացքում փոփոխություններ են տեղի ունեցել թիմում և մարզչական շտաբում: Ինչպիսի՞ն է թիմի մթնոլորտը: Ես 22 տարի է մարզվում եմ ձյուդոյով, ու այս ընթացքում փոփոխությունները շատ են եղել: Իմ սերնդակիցներից շատերը հիմա էլ չեն մարզվում ու երիտասարդներ են եկել: Բայց ես շատ հարմարվող մարդ եմ, ու կարողանում եմ մարզիչների ու թիմակիցների, բոլորի հետ էլ լեզու գտնել: Միշտ էլ ու հիմա էլ տղաներով շատ ենք իրար կապված, բոլորս բոլորիս համար ենք անում ու աշխատում: Կարևորը, որ մենք ընկերներ ենք, ու եթե մեզանից մեկը մեդալ է նվաճում, ապա այն բոլորինս է: Լավ, արի խոսենք նաև քո մարզական առաջին քայլերից: Ինչո՞ւ հենց ձյուդո: 7 տարեկանից մարզվում եմ: Ես ծնվել եմ Հրազդան քաղաքում, ու այնտեղ այդ ժամանակ միայն ձյուդոյի ու խոտի հոկեյի խմբակներ կային: Ես էլ ընտրեցի ձյուդոն: Ասեմ, որ ծնողներս տեղյակ չէին: Այն ժամանակ բժշկական թղթեր էին պետք, որպեսզի ներկայացնեինք սպորտդպրոց: Ես էլ վախենում էի, որ ծնողներիս ասեմ, նրանք կարգելեն ինձ մարզվել: Բայց մի քանի ամիս հետո տեղյակ պահեցի, ու նրանք հասկացան, որ ձյուդոն իմ ամեն ինչն է: Ի՞նչ երազանքներ կամ նպատակներ է ունենում պատանին, ով որոշում է իր ապագան կապել սպորտի հետ: Հենց այդ տարիքից ես երազում էի Օլիմպիական խաղերում հաղթելու մասին:
Քեզ համար առաջին Օլիմպիական խաղերը Աթենքում էին: Կհիշե՞ս քո առաջին ելույթն Աթենքում: Մարզիկներին ամենաշատը վնասվածքներն են խանգարում, ու դրանից վատ բան չի կարող լինել: Այդ Օլիմպիադայում Իրանի մարզիկի հետ գոտեմարտում ձեռքի վնասվածք ստացա ու չկարողացա շարունակել ելույթս: Արդեն չորս տարի անց դու Պեկինում էիր ու ավելի փորձառու: Այստեղ էլ չստացվեց: Եգիպտացու հետ մենամարտը հավասար վերջացավ, բայց դատավորները որոշեցին հաղթանակը շնորհել նրան, ու ես դուրս մնացի հետագա պայքարից: Լոնդոնյան խաղերը քեզ համար թվով 3-րդն են լինելու: Ավելի փորձառու ես լինելու և ավելի պատրաստված: Այդուամենայնիվ լարվածություն կա՞ քո մեջ: Ոչ, տարիների ընթացքում լարվածությունը, հուզմունքը անցել են: Հիմա ես ավելի հանգիստ եմ ու հավասարակշռված: Նպատակ ունեմ իմ առջև դրած, ու անելու եմ ամեն ինչ, որ հասնեմ դրան: Օլիմպիական խաղերը քառամյակի ամենակարևոր իրադարձությունն են: Դու այդքան մեդալներ ունես քո ակտիվում, իսկ ի՞նչ է քեզ պետք, որպեսզի ունենաս նաև Օլիմպիական մեդալ: Պետք է տակտիկական խնդիրների վրա աշխատեմ: Ես ուսումնասիրել եմ մրցակիցներիս, նրանք թվով 32-ն են: Շատերին ճանաչում եմ, քանի որ տարբեր մրցաշարերի ժամանակ հանդիպել եմ նրանց ու ծանոթ եմ նրանց ոճին: Գոհար Նալբանդյան / PanARMENIAN News Արմեն Նազարյան Արմեն Նազարյանը ծնվել է 1982 թվականի հունիսի 20-ին Հրազդան քաղաքում: Հայ ամենահայտնի և տիտղոսակիր ձյուդոիստներից է և երկար տարիներ հանդես է գալիս Հայաստանի հավաքականի կազմում: | Զախարովա․ ՀՀ-ն շարունակում է ՀԱՊԿ լիարժեք անդամ մնալ իր համապատասխան պարտավորություններով Նա նաև ասել է, որ ՌԴ–ն կասկածի տակ չի դնում իր արտաքին քաղաքական կուրսն ընտրելու ՀՀ սուվերեն իրավունքը Կուպմանը Բաքվում ասել է, որ Եվրահանձնաժողովը ողջունում է ՀՀ-ի և Ադրբեջանի միջև վերջին պայմանավորվածությունները Նա ասել է, որ Եվրահանձնաժողովում դրական են գնահատում Հարավային Կովկասում վերջին իրադարձությունները ԱՄՆ–ն պատժամիջոցներ է սահմանել որոշ թուրքական և ադրբեջանական ընկերությունների դեմ՝ ՌԴ–ին աջակցելու համար Պատժամիջոցներն առնչվում են այն ընկերություններին և ֆիզիկական անձանց, որոնք օգնում են Մոսկվային ռազմական բաղադրիչներ ստանալ Էրդողան․ Թուրքիան որոշել է խզել առևտրային կապերն Իսրայելի հետ Առևտրաշրջանառությունը երկրների միջև հասնում է 9․5 մլրդ դոլարի |