ՄԱՐՏԻ 18-ԻՆ ՏԵՂԻ ԿՈՒՆԵՆԱ ԱՊՀ ԱՐՏԳՈՐԾՆԱԽԱՐԱՐՆԵՐԻ ԽՈՐՀՐԴԻ ՆԻՍՏԸ

12 մարտի 2005 - 07:09 AMT

PanARMENIAN.Net - Մարտի 18-ին Մինսկում կկայանա ԱՊՀ Արտգործնախարարների խորհրդի նիստը: Ենթադրվում է , որ առաջիկա հանդիպման կենտրոնական հարցը կդառնա ԱՊՀ մարմինների բարեփոխման խնդիրը: Նիստի օրակարգի նախագծում ընդգրկվել են նաեւ անվտանգության եւ հանցավորության դեմ պայքարի ոլորտում համագործակցությանն առնչվող հարցեր, ինչպես նաեւ մարդասիրական բնույթի հարցեր: Հանդիպման մասնակիցները կքննարկեն ահաբեկչության եւ ծայրահեղականության դրսեւորումների դեմ պայքարում ԱՊՀ անդամ-երկրների համագործակցության կոնցեպցիայի նախագիծը, ապօրինի միգրացիային հակազդելու ԱՊՀ անդամ-երկրների 2006-2008 թվականների համագործակցության ծրագրի նախագիծը, մաքսային հանցագործությունների դեմ պայքարում ԱՊՀ մասնակից-պետությունների Համագործակցության մասին նախագիծը: Բացի այդ, կքննարկվի պայթուցիկ նյութերի, սպառազինության եւ հրազենի նշագրման միացյալ համակարգի կոնցեպցիայի նախագիծը, որը նախաձեռնել եւ քննարկման է դնում ԱՊՀ մասնակից-պետությունների անվտանգության մարմինների եւ հատուկ ծառայությունների Խորհուրդը: Հումանիտար ոլորտին վերաբերող հարցերի թվում են նաեւ ԱՊՀ մասնակից-երկրներում մեծահասակների կրթության զարգացման կոնցեպցիայի նախագիծը, ինչպես նաեւ Երիտասարդության հետ աշխատանքի ոլորտում համաձայնագրի նախագիծը, որը նախատեսում է ԱՊՀ անդամ-պետությունների Երիտասարդության գործերով խորհրդի ստեղծում: Համագործակցության երկրների արտաքին քաղաքական գերատեսչությունների ղեկավարները կքննարկեն Բելառուսի հանրապետության առաջարկը` չորս առաջատար բելառուսական բուհերին կրթական հաստատությունների արտոնագրման, ատեստավորման եւ հավատարմագրման ոլորտներում ԱՊՀ անդամ-երկրների բազային կազմակերպության կարգավիճակ շնորհելու վերաբերյալ: Այդ բուհերն են. Բելառուսի ազգային տեխնիկական համալսարանը` բարձրագույն տեխնիկական կրթության ոլորտում, Բելառուսի ինֆորմատիկայի եւ ռադիոէլեկտրոնիկայի պետական համալսարանը` ինֆորմատիկայի եւ ռադիոէլեկտրոնիկայի կրթության ոլորտներում, Ա.Դ.Սախարովի անվան միջազգային պետական բնապահպանական համալսարանը` էկոլոգիական կրթության ոլորտում: ԱՊՀ անդամ-երկրների կրթության ոլորտում համագործակցության խորհուրդը նաեւ առաջարկ է արել բազային կազմակերպությունների կարգավիճակ շնորհելու վերաբերյալ Հայաստանի հանրապետության Ինֆորմատիկայի գծով կադրերի որակավորման բարձրացման եւ վերապատրաստման պետական ինստիտուտին` սահմանափակ ֆիզիկական հնարավորություններով անձանց եւ գործազուրկների կրթության ոլորտում: Եվ Ռուսաստանի ժողովրդների բարեկամության պետական համալսարանին` ԱՊՀ անդամ-պետություններիի կրթական համակարգերի տեղեկատվական համագործակցության ոլորտում: