ԵՐԵՎԱՆՈՒՄ ՏԵՂԻ ԿՈՒՆԵՆԱ ՄԻՋԱԶԳԱՅԻՆ ԽՈՐՀՐԴԱԺՈՂՈՎ` ՆՎԻՐՎԱԾ ԱՀԱԲԵԿՉՈՒԹՅԱՆ ԴԵՄ ՊԱՅՔԱՐԻՆ

PanARMENIAN.Net - Մայիսի 24-25 Երեւանում տեղի կունենա «Տոլերանտություն, պայքար խտրականության եւ քսենոֆոբիայի դեմ` միջազգային ահաբեկչության դեմ պայքարի համատեքստում («Կավկասյան չափում») միջազգային խորհրդաժողովը, որի կազմակերպիչն է Հայաստանի Մարդու իրավունքների պաշտպանության ինստիտուտը ՅՈՒՆԵՍԿՈ-ի հովանու ներքո: Ինչպես հաղորդել են Մարդու իրավունքների պաշտպանի աշխատակազմի Տեղեկատվության եւ հասարակության հետ կապերի դեպարտամենտում, միջոցառումը կոչված է նպաստելու խաղաղության ամրապնդմանը, փոխադարձ հանդուրժողականության եւ վստահության մթնոլորտի ձեւավորմանը եւ երկխոսության հաստատմանը տարածաշրջանի երկրների միջեւ մարդու իրավունքների պաշտպանության ոլորտում: Խորհրդաժողովին կմասնակցեն 60 հոգի Հայաստանից, Ադրբեջանից, Վրաստանից, Ռուսաստանից` միջազգային, միջպետական եւ հասարակական կազմակերպությունների ներկայացուցիչներ: Մասնակիցների թվում են` Ռուսաստանի Դաշնության մարդու իրավունքների գծով լիազոր Վլադիմիր Լուկինը, Օմբուդսմենի Եվրոպական ինստիտուտի գործադիր կոմիտեի անդամ Նիկոլաուս Շվերցլերը (Ավստրիա), Սանքտ Պետերբուրգի «Ռազմավարություն» հումանիտար քաղաքագիտական կենտրոնի նախագահ Ալեքսանդր Սունգուրովը, Վրաստանի Ժողովրդական պաշտպանի աշխատակազմի պատասխանատու աշխատակիցներ, ինչպես նաեւ ՅՈՒՆԵՍԿՈ-ի եւ Ռուսաստանի մարդու իրավունքների գծով լիազորը, ՄԱԿ-ի Զարգացման ծրագրի երեւանյան ներկայացուցչության, Ռուսաստանի դեսպանատան, Հայաստանի նախագահի աշխատակազմի, ինչպես նաեւ Հայաստանի ազգային փոքրամասնությունների հասարակական կազմակերպությունների ներկայացուցիչներ, հաղորդում է «Ռեգնում» գործակալությունը: