Դավութօղլու. Թուրքերի վերաբերմունքն իսլամին «360 աստիճանով տարբերվում է ԻՊ մոտեցումից»

PanARMENIAN.Net - Թուրքերի վերաբերմունքն իսլամին «360 աստիճանով» տարբերվում է «Իսլամական պետության» մոտեցումից: Այդ մասին պատմել է Թուրքիայի վարչապետ Ահմեդ Դավութօղլուն:

Դավութօղլուն թույլ է տվել վրիպակը, երբ հեռուստատեսային ելույթում փորձել է հերքել այն պնդումը, թե Անկարայում տեղի ունեցած ահաբեկչությունների համար պատասխանատու է նաև Թուրքիայի կառավարությունը:

«Տարբերությունը մեր պաշտպանած իսլամի և այն իսլամի միջև, որն ահաբեկիչների գլխում է, նույնիսկ ոչ թե 180 աստիճան է, այլ 360»,-ասել է վարչապետը: Նա ցանկացել է ընդգծել, որ ԻՊ-ն բացառիկություն է քարոզում, մինչդեռ Թուրքիայում իսլամը հանդուրժողական է և գոյակցում է ժողովրդավարության հետ: Ընդդիմությունն ու բլոգերներն անմիջապես հիշեցրել են, որ 360 աստիճանն ամբողջական շրջադարձ է նշանակում և միանգամայն հակառակ է այն պնդմանը, որը ցանկացել էր ձևակերպել Դավութօղլուն:

Մոտ 100 մարդ է զոհվել հոկտեմբերի 10-ին Անկարայում տեղի ունեցած 2 պայթյունի հետևանքով: Պայթյունները տեղի են ունեցել տեղի ժամանակով մոտ 10:00-ին: 246 մարդ վիրավորվել է: Դա տեղի է ունեցել երկաթուղային կայարանի շրջանում, որտեղ անցնում էր արհմիությունների կազմակերպած «Աշխատանք, խաղաղություն, ժողովրդավարություն» կարգախոսով հակապատերազմական հանրահավաքը:Ավելի ուշ հայտնի դարձավ, որ իշխանությունները պայթյունները որակել են որպես ահաբեկչություն:

Ահաբեկչությունները, ենթադրաբար, 2 մահապատ ահաբեկիչ է կազմակերխպել: Իշխանությունները որպես մեղսակից կասկածում են «Իսլամական պետությանը», ՔԱԿ-ին և 2 ձախակողմյան ծայրահեղական խմբավորումների: «Ամեն ինչ հուշում է, որ ահաբեկչությունը կարող էր ԻՊ-ն կատարել: Մենք այժմ ամբողջությամբ կենտրոնացել ենք ԻՊ վրա»,-ասել է աղբյուրը գործակալությանը:

Անկարայի պայթյունները շատ նման են հուլիսի 20-ին Սուրուչում տեղի ունեցած ահաբեկչությանը: Անկարայում պայթյունի կատարողներից մեկի եղբայրը, ենթադրաբար, Սուրուչում պայթյունն իրականացրած ահաբեկչի եղբայրն է: