ԱԳ փոխնախարար. Մարտունու, Մարտակերտի շրջանի օկուպացված տարածքներն ուշ թե շուտ վերադարձվելու են

PanARMENIAN.Net - Ադրբեջանի կողմից օկուպացված են Լեռնային Ղարաբաղի Հանրապետության Մարտունու, Մարտակերտի շրջանի տարածքներ, որոնք ուշ թե շուտ վերադարձվելու են ԼՂՀ-ին:

Այս մասին հայտարարել է ՀՀ արտաքին գործերի նախարարի տեղակալ Շավարշ Քոչարյանը, պատասխանելով հարցին, թե միջազգային դիվանագիտական դաշտում ինչպե՞ս է ընկալվում այն արտահայտությունը, որ մենք կորցրել ենք 800 հա տարածք, և դրանք նշանակալի հատվածներ չեն:

Խոսելով օկուպացված տարածքների մասին, Քոչարյանը նկատի է ունեցել 1994 թվականից ի վեր Ադրբեջանի ենթակայության տակ մնացած նախկին ԼՂԻՄ տարածքները:

Անդրադառնալով Վիեննայում նախագահների հանդիպմանը՝Քոչարյանն ասել է. «Վիեննայով հիմք դրվեց մի շատ կարևոր գործընթացի, որի էությունը այն է, որ մինչև չկա հաստատված կրակի դադարեցման ռեժիմ, վստահության միջոցներ գոյություն չունեն, դժվար է և գրեթե անհնարին է ակնկալել որևէ առաջընթաց», մեջբերում է Panorama.am-ը:

Լրագրողի դիտարկմանը, թե ՀՀ երկրորդ նախագահը, ԼՂՀ պաշտպանության բանակի նախկին հրամանատարը քննադատում են ՀԱՊԿ-ին՝ նշելով, որ մենք պետք է վերանայենք մեր հարաբերությունները ՀԱՊԿ-ի հետ, ԱԳ փոխնախարարը պատասխանել է. «Նախ՝ ես ուշադիր նայել եմ, այնտեղ խոսք չկա նրա մասին, որ պետք է վերանայել: Իսկ ինչ վերաբերում է մեր վերաբերմունքին՝ թե ՀԱՊԿ-ին, թե ԵԱՏՄ-ին, ապա վերջին գագաթաժողովը, որը տեղի ունեցավ Աստանայում, այնտեղ նախագահի ելույթից ամբողջությամբ կարող եք ձեզ համար պարզ պատկերացնել»:

Սերժ Սարգսյանը մայիսի 17-ին՝ Վիեննայում բանակցություններից հետո, հայտնել էր, որ հայկական ուժերը քառօրյա պատերազմում կորցրել են 800 հա-ի չափ (8 քկմ) տարածք, որը ռազմավարական կամ մարտավարական տեսակետից որևէ նշանակություն չունի: Նախագահի խոսքով, հայկական կողմ ի վիճակի էր վերականգնել այդ ստատուս-քվոն, բայց այլ հարց է, թե «արդյոք արժեր այդ 800 հա-ի համար կորցնել այդքան մարդ, որոնց կարիքը դեռ շատ ենք ունենալու»: