ՀՅԴ-ն «իշխանություն ձևավորելու հանձնառություն» է ստանձնում

PanARMENIAN.Net - Հայ Յեղափոխական Դաշնակցության (ՀՅԴ) Հայաստանի կազմակերպության 23-րդ Գերագույն Ժողովը հայտարարություն է տարածել՝ նշելով, որ «Դաշնակցությունը ստանձնում է ազգային, ժողովրդավարական, սոցիալիստական գաղափարական հենքով քաղաքական առանցք և իշխանություն ձևավորելու հանձնառություն»։

Հայտարարության մեջ նշվում է, որ Դաշնակցությունը, «հավատարիմ իր սկզբունքներին ու արժեհամակարգին, համահայկական կառույցի զորակցությամբ, հետամուտ է հայրենիքի հզորացմանը, Հայաստանի և Արցախի Հանրապետությունների անվտանգության համակարգերի ամրապնդմանը, Հայրենիք-Սփյուռք փոխհարաբերությունների խորացմանը` համոզումով, որ միայն հանրային և համազգային համերաշխության պայմաններում է երկիրն ունակ դիմագրավել ներազգային և արտաքին մարտահրավերները»:

Գերագույն Ժողովն արձանագրում է, որ 2018 թվականի ժողովրդային շարժումով և արտահերթ խորհրդարանական ընտրություններով պայմանավորված՝ Հայաստանի ներքաղաքական կյանքը մտել է «բազմաթիվ մարտահրավերների և անորոշությունների դիմագրավման նոր շրջափուլ»:

Ըստ ՀՅԴ-ի պնդման՝ Արցախի հարցում իշխանությունների «խուսափողական քաղաքականությունը մտահոգիչ է և չի նպաստում հիմնախնդրի հանգուցալուծման շուրջ համազգային համախմբմանը»։

«Ազգային, ավանդական, հոգևոր, մշակութային արժեքների, պետական խորհրդանիշերի և հաստատությունների նկատմամբ ուղղորդված հեղինակազրկման արշավը, ինչպես նաև ներազգային անհանդուրժողականության մթնոլորտը սպառնում են ազգային անվտանգությանը և միասնականությանը: Զարգացման ռազմավարական ծրագրերի բացակայության, անկանխատեսելի արտաքին քաղաքականության, ուղղորդվող արդարադատության, իշխանությունների որդեգրած գործելաոճի, կառավարման որակների, ինչպես նաև հանրային կյանքի բոլոր ոլորտներում շոշափելի արդյունքներ չարձանագրելու հետևանքով զգալի է հանրային լավատեսության անկման միտումը», - նշված է հայտարարության մեջ: