Լուկաշենկո․ Դպրոցներում պետք է աշխատեն միայն պետական գաղափարախոսության կողմնակիցները

PanARMENIAN.Net - Բելառուսի նախագահ Ալեքսանդր Լուկաշենկոն հայտարարել է, որ պետական դպրոցներում պետք է աշխատեն միայն այն ուսուցիչները, որոնք կողմ են պետական գաղափարախոսության սկզբունքներին։

«Ով չի ուզում հետևել այդ կանոններին, չպետք է դպրոցում լինի։ Սա պետք է ուղիղ, անկեղծ ու ազնիվ ասել»,- ասել է նա։

Լուկաշենկոն նաև հորդորել է զբաղվել «մյուս ճամբար անցած» ուսուցիչների հարցով։

Նա պահանջել է կրթության նախարարությունից պաշտպանել «հարձակումներից» պետգաղափարախոսությանը սատարող ուսուցիչներին և «կտրուկ կասեցնել հոխորտանքները նրանց հասցեին», գրում է ՌԲԿ-ն։

Օգոստոսի 9-ին Բելառուսում նախագահական ընտրություններում ընտրատեղամասերից շատերը դպրոցներում էին տեղակայված, իսկ ուսուցիչները տեղամասային հանձնաժողովների անդամներ էին։

Ընտրությունների ավարտից հետո երկրում հակակառավարական ցույցեր են, որոնք առաջին օրերին ուղեկցվել են ոստիկանության կողմից բռնի ուժի կիրառմամբ։ Ընդդիմությունը պնդում է, որ գործող նախագահ Լուկաշենկոյի նախաձեռնությամբ ընտրությունների արդյունքները կեղծվել են: Ըստ պաշտոնական տվյալների՝ նա հավաքել է ձայների 80.1%-ը, իսկ նրա հիմնական հակառակորդ Սվետլանա Տիխանովսկայան՝ 10.1%։