ԱՆ․ Բանակցում ենք ռուսական Sputnik V պատվաստանյութի ձեռքբերման շուրջ

3 փետրվարի 2021 - 18:31 AMT

PanARMENIAN.Net - Առողջապահության նախարարության մասնագետներն ակտիվ բանակցություններ են վարում ռուսական Sputnik V պատվաստանյութի ձեռքբերման շուրջ։ Այդ մասին առողջապահության նախարար Անահիտ Ավանեսյանն ասել է ՀՀ-ում Ռուսաստանի դեսպան Սերգեյ Կոպիրկինի և ՌԴ դեսպանության խորհրդական Պավել Կուրոչկինի հետ հանդիպմանը։

«Այս համատեքստում կուզեի նշել, որ ՀՀ առողջապահության նախարարությունը COVAX FACILITY նախաձեռնության շրջանակում համագործակցության համաձայնագիր է ստորագրել, այդուհանդերձ, պատրաստ ենք նաև ձեռք բերել ռուսական Sputnik V պատվաստանյութի լրացուցիչ խմբաքանակներ այս նախաձեռնության շրջանակում», - ասել է Ավանեսյանը:

Նախարարն իր երախտագիտությունն է հայտնել Ռուսաստանին` կորոնավիրուսային վարակի դեմ պայքարում ցուցաբերած անգնահատելի աջակցության համար՝ ընդգծելով, որ վերջին մեկ տարվա ընթացքում ռուս գործընկերների հետ ակտիվ գործակցել են:

Ավանեսյանը կարևորել է ռուսական կողմից Հայաստանին պարբերաբար տրամադրվող աջակցությունը` պատվաստանյութեր, լաբորատոր և ախտորոշիչ սարքավորումներ, այդ թվում` ախտորոշիչ-բուժական շարժական կլինիկաներ:

Հանդիպման ընթացքում կողմերը քննարկել են հայ-ռուսական միջկառավարական հանձնաժողովի նիստի արձանագրության շրջանակում երկու երկրի առողջապահության նախարարությունների միջև ձեռք բերված գործակցության ուղղությունները:

Երկկողմ հարաբերությունների զարգացման գործում մեծ դերակատարում ունեն հայ-ռուսական առողջապահական համաժողովները, որոնք տարեկան կտրվածքով անց են կացվում Մոսկվայում և Երևանում: Հերթական` 2021 թվականի համաժողովը նախատեսվում է անցկացնել Մոսկվայում: