Քոչարյան. Արտաքին հետախուզությունը պետք է լինի, որ թույլ չտա «Նեմեսիսի» անվան տակ վրեժխնդրությունը

PanARMENIAN.Net - «Քաղաքացիական պայմանագիր» խմբակցության պատգամավոր Անդրանիկ Քոչարյանն ԱԺ-ում, Արտաքին հետախուզություն ստեղծելու քննարկման ժամանակ արձագանքելով «Նեմեսիս» գործողության մասին պատգամավոր Գեղամ Մանուկյանի դիտարկմանը, ասել է, որ կստեղծվի արտաքին հետախուզություն՝ այդ ֆունկցիան պետությունը կվերցնի իր վրա՝ թույլ չտալու համար «Նեմեսիսի» անվան տակ վրեժխնդրության խնդիր լուծել։

«Հայաստան» խմբակցության պատգամավոր Գեղամ Մանուկյանն իր ելույթում ասել է, որ Դաշնակցության «Նեմեսիս» գործողությունը հայկական պետականության առաջին հետախուզությունն է եղել, գրում է Factor.am-ը։

«Դաշնակցության աստվածն արդարադատ է, ոտքի վրա առանց հիմքի որոշում չի կայացնում։ Երբ ունենում է հիմք, որոշումը կայացնում է․ ձեռքն էլ չի դողում»,- ասել է նա։

Արձագանքելով Քոչարյանն ասել է․ «Մի վտանգավոր շեշտադրում լսեցի «Նեմեսիսի» մասին»։

«Եթե Դաշնակցության կողմից «Նեմեսիսը» գնահատվում է որպես մեր արտաքին հետախուզության հիմքը, այդ դեպքում հարց է առաջանում՝ այդ հիմքն ինչի՞ մեջ է ներառված, և «Նեմեսիսի» ձեռքով քանի մարդ է սպանվել, եթե սպանվել է․․․Դուք ասում եք՝ ձեռքը չի դողա։ Ձեռքերը պետք է դողան։ Դրա համար կստեղծվի արտաքին հետախուզությունը, այդ ֆունկցիան պետությունը կվերցնի իր վրա՝ թույլ չտալու համար «Նեմեսիսի» անվան տակ վրեժխնդրության խնդիր լուծել»,- ասել է Քոչարյանը։

Խորհրդարանը երկրորդ ընթերցմամբ և ամբողջությամբ հավանություն է տվել Արտաքին հետախուզական գործունեության և արտաքին հետախուզության ծառայության մասին օրենքի և հարակից օրենքներում փոփոխություններ և լրացումներ կատարելու մասին օրենքի նախագծին: ‌