Viva University. Մեկնարկային հնարավորություն՝ բուհերի ուսանողների համար

1 օգոստոսի 2023 - 15:45 AMT

PanARMENIAN.Net - Վիվա-ՄՏՍ-ի Viva University կրթական ծրագիրը մեկնարկային հնարավորություն է բուհերի ուսանողների համար։

Ցանկացած ոլորտում աշխատանքի անցնելու և հաջողված մասնագետ լինելու համար պահանջվում է ոչ միայն տեսական, այլև գործնական գիտելիք, անհրաժեշտ հմտություններ, ինքնաբացահայտման և զարգացման մեկնարկային հնարավորություն: Դա կարևոր առավելություն է թե´ գործատուի, թե´ աշխատանք փնտրողի համար:

Տավուշի մարզի սահմանամերձ Բերդ քաղաքում ապրող Մարիամը սովորում է պատմության ֆակուլտետում: Սիրում է իր մասնագիտությունը, սակայն իրատեսորեն է գնահատում կյանքը և չի սահմանափակվում ունեցած գիտելիքներով:

Մանկավարժական համալսարանի ավարտական կուրսի ուսանողուհին որոշել է իր ներուժը բացահայտել նաև այլ ոլորտում: Գիտի, որ ապագան տեխնոլոգիաներինն է և աշխատաշուկայում հաստատուն տեղ ունենալու համար պետք է պատրաստ լինել տարբեր մարտահրավերների: Դրանցից ամենակարևորը շարունակական զարգացումն է, որը աշխատասիրություն ու կամք է պահանջում:

Մարիամը տարբեր բուհերի 150 ուսանողի հետ մասնակցել է Վիվա-ՄՏՍ-ի Viva University (Վիվա յունիվերսիթի) կրթական ծրագրի ընտրական փուլին և ստացել սպասարկման կենտրոնում երկամսյա դասընթացի մասնակցելու հնարավորություն: Վստահ է, որ այն, ինչը կյուրացնի գործնականում, իրեն անհրաժեշտ է լինելու միշտ՝ անկախ ունեցած աշխատանքից: Այժմ դասընթացների է մասնակցում հարազատ քաղաքում՝ Բերդում գործող Վիվա-ՄՏՍ-ի սպասարկման կենտրոնում: Օրն սկսում է բացահայտումներով և ավարտում կատարելագործվելու ձգտումով: Տեսնում է Վիվա-ՄՏՍ-ի աշխատակիցների թիմային աշխատանքը, գործին նվիրումը, բաժանորդի հետ արդյունավետ հաղորդակցվելու անհրաժեշտությունը, դրսևորվող հարգանքը և սովորում թե ինչպես բարձրացնել հաճախորդների գոհունակության մակարդակը:

«Երբ ես բաժանորդ էի, բավական հեշտ էր թվում աշխատանքը: Այժմ տեսնում եմ, որ այն ավելի բարդ է և ավելի պատասխանատու: Պետք է լինել պարտաճանաչ, հետևել բոլոր կանոններին, օրենքին, քաղաքակիրթ շփվել բոլոր տեսակի և խառնվածքի բաժանորդների հետ և լինել աշխատասեր: Հարկավոր է ոչ միայն եղածով բավարարվել, այլև ինքնակրթվել: Ես ապրում եմ Տավուշի մարզում, (Երևանից բավականին հեռու է) և սահմանամերձ գոտում գտնվելով՝ չէի պատկերացնում, որ նման հնարավորություն կունենամ: Սպասարկման ոլորտում ես ինձ բացահայտել եմ նորովի: Իմ ունակությունները, մարդկանց հետ շփումը, նրանց հետ հաղորդակցվելը բացահայտում են ինձ համար: Ուզում եմ, որ այդ ամենն ինձ մոտ դրսևորվի ոչ թե միայն այս փուլում, այլ՝ միշտ», - ասել է Մարիամ Մելիքյանը:

Արդեն 8 տարի՝ 2015 թվականից, Վիվա-ՄՏՍ-ն իրականացնում է կրթական կարևոր ծրագիր՝ Հայաստանի տարբեր բուհերի ուսանողների համար: Այս տարվա ծրագրով մայրաքաղաքում և մարզերում երկամսյա դասընթացների է մասնակցում տարբեր բուհերի 22 ուսանող: Viva University-ն մեկնարկային հնարավորություն է ոչ միայն հմտությունների բացահայտման, մասնագիտացման, այլև աշխատաշուկայում «դիրքավորման» տեսանկյունից: Այս տարվա ծրագրով ուսանողները մասնագիտական փորձառություն են ձեռք բերելու 2՝ ՏՏ (տեղեկատվական տեխնոլոգիաների) և վաճառքի ու բաժանորդների սպասարկման ոլորտում:

Կրթական ծրագրի բազմազանությունը երկու հոսքերի պրակտիկանտներին թույլ կտա ուսումնասիրել և զարգացնել և´ նեղ մասնագիտական, և´ ընդհանուր գիտելիքները հեռահաղորդակցության ոլորտում: