Սփյուռքահայ գործարարները հորդորել են Փաշինյանին հրապարակել այն բառերի ցանկը, որոնք նրան «նյարդայնացնում են»

PanARMENIAN.Net - Մի խումբ սփյուռքահայ գործարարներ բաց նամակով դիմել են վարչապետ Նիկոլ Փաշինյանին՝ կոչ անելով հրապարակել այն բառերի, արտահայտությունների «ցանկը, որոնք նյարդայնացնում են նրան և որոնք կարող են հանգեցնել ազատազրկման», հայտնում է Yerkir.am-ը։

«Աշխարհի ամենահարուստ և ամենաազդեցիկ հայը՝ Սամվել Կարապետյանը, ավելի քան 30 տարի հարյուր միլիոնավոր դոլարներ է նվիրաբերել Հայաստանում իրականացվող բարեգործական նախագծերին: Եվ հիմա, Ձեր անձնական հանձնարարությամբ, նա կալանավորվել է, և սկսվել է նրա ակտիվների ազգայնացման գործընթացը: Պատճառը, ինչպես մենք հասկանում ենք, ընդամենը Հայ եկեղեցու պաշտպանության համար նրա արտաբերած խոսքերն են. «Մենք հարցերը կլուծենք մեր ձևով»:

Մենք՝ մեր պատմական հայրենիքից դուրս ապրող և մեր համեստ խնայողությունները Հայաստանում բիզնես նախագծերում ներդրած ձեռնարկատերերն ու գործարարները, մեղմ ասած, շփոթված ենք: Եվ, անկեղծ ասած, սկսում ենք անհանգստանալ թե՛ մեզ համար, թե՛ մեր ներդրումների համար:

Մենք պարբերաբար այցելում ենք Հայաստան և, հանցագործություն կատարելուց խուսափելու համար, խնդրում ենք Ձեզ շտապ կարգով հրապարակել այն բառերի, արտահայտությունների ցանկը, որոնք արգելված են օրենքով Հայաստանում կամ որոնք նյարդայնացնում են ձեզ՝ այդպիսով դառնալով վտանգավոր կամ անցանկալի օգտագործման համար: Մենք հատկապես հետաքրքրված ենք նրանցով, որոնք կարող են հանգեցնել ազատազրկման կամ գույքի կորստի: Նախապես շնորհակալություն ենք հայտնում Ձեր ըմբռնման և աջակցության համար:

Նամակը ստորագրել են Արսեն Բեյբուրթյանը (Փարիզ, Ֆրանսիա), Մարկ Փոթիկյանը (Մասաչուսեթս, ԱՄՆ), Ռոբերտ Կետիկյանը (Միլան, Իտալիա), Քրիստոֆեր Բալաջյանը (Դորտմունդ, Գերմանիա), Հակոբ Մակունցը (Մոսկվա, Ռուսաստան), Դավիթ Ջրպեշյանը (Կրասնոդար, Ռուսաստան), Պատրիկ Սուվարյանը (Ժնև, Շվեյցարիա), Արմեն Բաղդասարյանը (Սոֆիա, Բուլղարիա)։

Հունիսի 18-ին Սամվել Կարապետյանը կալանավորվել է երկու ամսով և տեղափոխվել «Արմավիր» ՔԿՀ` ՀՀ կառավարության լիազորություններին տիրանալnւն ուղղված հրապարակային կոչի համար։

Ի պատասխան Փաշինյանը գրել էր․ «Պոռնկաբարո «հոգևորականներն» ու նրանց պոռնկաբարո «բարեգործներն» ինչո՞ւ են ակտիվացել։ Ոչինչ՝ նորից կպասիվացնենք։ Ընդ որում՝ ընդմիշտ»: Ավելի ուշ նա հավելել է, որ ՀԷՑ–ը պետք է պետականացվի և շատ արագ։