Տարածաշրջանում ռազմական գործողությունների վերսկսման հնարավորությունը ոչ ավելին է, քան 5 տարի առաջ

9 փետրվարի 2010 - 14:11 AMT

PanARMENIAN.Net -
Ռազմական գործողությունները տարածաշրջանում միշտ հնարավոր են, դրանից պետք չէ վախենալ, անհրաժեշտ է դրան պատրաստ լինել: Այդ մասին Երեւանում կայացած մամլո ասուլիսում հայտարարել է ԼՂՀ ԱԳ նախկին նախարար Արման Մելիքյանը: Ըստ նրա, Հայաստանը միշտ պետք է աչալուրջ լինի: «Տարածաշրջանում ռազմական գործողությունների վերսկսման հնարավորությունն այս պահի դրությամբ ոչ ավելին է, քան 5 տարի առաջ»,-ասել է Մելիքյանը` հավելելով, որ 5 տարի առաջ պատերազմի հավանականությունը բավական մեծ էր: Ընդ որում, նա նշել է, որ Ադրբեջանը պատերազմ չի սկսի, մինչեւ երաշխիքներ չստանա որեւէ գերտերությունից:

Անդրադառնալով ՌԴ-ի դիրքորոշմանը ղարաբաղյան հակամարտության կարգավորման հարցում` Մելիքյանն ասել է, որ Մոսկվան կարող է օգտվել իրավիճակից եւ ՀՀ իշխանությունների համաձայնությամբ զիջումների գնալ Բաքվին ղարաբաղյան կարգավորման հարցում` Ադրբեջանում սեփական դիրքերն ամրապնդելու համար:

Ղարաբաղյան կարգավորման ավարտի վատագույն սցենարը կարող է լինել Ղարաբաղի հայաթափումը, նշել է Մելիքյանը:

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: