Հայաստանի 440 խոշոր հարկատուները պետբյուջե են վճարել 20,3 մլրդ դրամ

PanARMENIAN.Net - ՀՀ ԿԱ պետական եկամուտների կոմիտեի կողմից մշակվել և վերլուծության է ենթարկվել «Խոշոր հարկ վճարողների հարկային վճարումների մոնիտորինգի հրապարակման ենթակա 2011թ.-ի մարտ ամսվա ամփոփ ցուցանիշները» համաձայն ՀՀ ԿԱ ՊԵԿ նախագահի հրամանով հաստատված Խոշոր հարկ վճարողների հարկային տեսչության կողմից 2011թ.-ի ընթացքում սպասարկվող 440 հարկ վճարողների ցանկի, որի արդյունքում պարզվել է. Պետական բյուջե վճարված հարկերի և այլ պարտադիր վճարների ցուցանիշի առումով 2011թ.-ի մարտին խոշոր հարկ վճարողների կողմից վճարվել է շուրջ 20.3 մլրդ. դրամ: Ընդ որում, նշված կազմակերպությունների կողմից 2011թ.-ի մարտ ամսին վճարվել է հանրապետությունում հավաքագրված հարկային եկամուտների 60.1 %–ը:

2011թ.-ի մարտին հարկային մարմնի կողմից կատարվել են 104 հարկային ստուգումներ, որոնց արդյունքում առաջադրվել է բյուջե լրացուցիչ վճարման ենթակա գումարներ 196.2 մլն դրամի չափով:

01.04.2011թ.-ի դրությամբ խոշոր հարկ վճարողներն ունեցել են 92.9 մլրդ դրամ գերավճար, այդ թվում` ավելացված արժեքի հարկի գծով` 51.5 մլրդ դրամ, իսկ հարկային պարտավորություն` 5.3 մլրդ դրամ: Բացի այդ, 2011թ.-ի մարտ ամսվա ընթացքում պետական բյուջեից հարկ վճարողների գերավճարների գումարներից ավելացված արժեքի հարկի վերադարձի ձևակերպում է կատարվել 1833.9 մլն դրամի չափով: