Հայաստանում լայնաշերտ ինտերնետից օգտվողների թիվը 2011-ի առաջին կիսամյակում աճել է 100 000-ով

12 հոկտեմբերի 2011 - 17:50 AMT

PanARMENIAN.Net - Այսօր ՀՀ հանրային ծառայությունները կարգավորող հանձնաժողովը մամլո ասուլիսի ժամանակ հանդես եկավ մի քանի հայտարարություններով։ Հանձնաժողովի անդամ Սամվել Արաբաջյանի խոսքով, հանձնաժողովն իր այսօրվա նիստում հաստատել է մեծածախ ինտերնետի սակագնի նոր բանաձևը՝1Մբ ինտերնետի համար այն կազմում է 35 600 դրամ։

«Այս ցուցանիշը զգալի նվազել է՝ համեմատած 2010-ի 174 000 դրամ սակագնի հետ։ Իսկ եթե համեմատենք նախորդ տարիների հետ, 2006-ին այս սակագինը կազմում էր 5 մլն 460 000 դրամ 1Մբ-ի համար։ Այս նվազումը պայմանավորված է ինտերնետի օգտագործողների քանակի և միջազգային IP տարանցման տրաֆիկի կտրուկ աճով։ Եթե մենք հունվարին ունեինք 10Գբ ընդհանուր ծավալ ամբողջ երկրով, կիսամյակի վերջում ունենք՝ 17Գբ, իսկ մինչև տարվա վերջ կանխատեսում ենք այս դինամիկայի աճ՝ մինչև 22Գբ»,-նշեց նա։

2011-ի հունվարից մինչև կիսամյակի վերջ գրանցվել է նաև լայնաշերտ ինտերնետի օգտագործողների աճ շուրջ 100 000-ով։ Ըստ Սամվել Արաբաջյանի, կիսամյակի վերջում օգտագործողների ընդհանուր թիվը կազմել է 340 000 օգտագործող։

Ինչպես հավելեց Սամվել Արաբաջյանը, ՀԾԿՀ-ն որոշում է միայն խոշոր ընկերությունների սակագները։