«Եվրատեսիլ-2012». Վրաստանը կներկայացնի Անրի Ջոխաձեն «Ես ջոկեր եմ» երգով

20 փետրվարի 2012 - 13:07 AMT

PanARMENIAN.Net - «Եվրատեսիլ-2012» մրցույթում, որն անցնելու է Բաքվում, Վրաստանը կներկայացնի Անրի Ջոխաձեն «Ես ջոկեր եմ» երգով, հայտնում է trend.az-ը: Ջոխաձեն հաղթել է փետրվարի 19-ին Վրաստանի Հանրային հեռարձակողի ստուդիայում կայացած ազգային մրցույթում՝ հեռուստադիտողի ու հատուկ ժյուրիի քվեարկության արդյունքում:

Վրաստանը ներկայացնելու իրավունքի համար պայքարել է 9 մասնակից ու խումբ՝ Անրի Ջոխաձեն, Լեվան Ջիբլաձեն, Էդվարդ Տատիանին, November խմբի Բորիս Բեդիյաին, Mirror Illusion, Vanilla Cage, REMA և Industrial City խմբերը:

Ադրբեջանական Էլլա և Նիկկի դուետը 2011թ-ի մայիսի 15-ին դարձավ Եվրատեսիլի հաղթող: Երկրորդ տեղը գրավեց իտալացի մասնակից Ռաֆայել Գուալազզին Madness Of Love երգով, իսկ երրորդ տեղում է Էրիկ Սաադը Շվեդիայից Popular երգով:

Մայիսի 10-ին Դյուսելդորֆում կայացավ «Եվրատեսիլ 2011» մրցույթի առաջին կիսաեզրափակիչը: Էմմին հանդես եկավ 4-րդ համարի տակ և մրցույթում ներկայացրեց «Boom-Boom» երգը և չանցավ եզրափակիչ փուլ:

Հայաստանը մի քանի ամիս որոշում էր, մասնակցե՞լ Բաքվում կայանալիք մրցույթին, թե ոչ: Հանրային հեռուստաընկերությունը Բաքվից և Եվրոպական հեռարձակողների միությունից (EBU) անվտանգության լուրջ երաշխիքներ էր պահանջում:

Հունվարի 17-ին EBU-ն մրցույթի պաշտոնական կայքում տեղադրեց մրցույթի մասնակից երկրների ցանկը, որտեղ նշված է նաև Հայաստանի անունը: Հայաստանի պատվիրակության ղեկավար Գոհար Գասպարյանը Հայաստանը Եվրոպական հեռարձակողների միության լիիրավ անդամ է և Բաքվում կայանալիք մրցույթին մասնակցելը դրա ապացույցն է: «Եվրատեսիլ 2012»-ի կիսաեզրափակիչ փուլերը կայանալու են մայիսի 22-ին և 24-ին, եզրափակիչը` մայիսի 26-ին: Հայաստանը ելույթ է ունենալու երկրորդ կիսաեզրափակիչում`Սերբիայի, Շվեդիայի, Վրաստանի, Նիդեռլանդների, Պորտուգալիայի, Սլովենիայի, Մակեդոնիայի, Էստոնիայի, Բելառուսի, Թուրքիայի, Մալթայի, Սլովակիայի, Խորվաթիայի, Նորվեգիայի, Ուկրաինայի, Հայաստանի, Լիտվայի, Բուլղարիայի, Բոսնիա և Հերցեգովինայի հետ: