Թուրքիայի հետ հարաբերությունների կարգավորման գործընթացում Հայաստանն արել է առավելագույնը

PanARMENIAN.Net - Թուրքիայի հետ հարաբերությունների կարգավորման գործընթացում Հայաստանն արել է առավելագույնը, ինչ կախված էր իրենից, եւ բարի կամք է դրսեւորել, չնայած պատմությանն եւ Հայոց ցեղասպանությանը: Այդ մասին ՀՀ Սփյուռքի նախարարության «Արի տուն» ծրագրի մասնակիցների հետ հանդիպմանը հայտնել է Հայաստանի նախագահ Սերժ Սարգսյանը: Նրա խոսքով, հայկական կողմը կարողացել է իր մեջ ուժ գտնել առաջարկելու Թուրքիային առանց նախապայմանների բացել սահմանը եւ սկսել ցանկացած հարցերի քննարկումը: «Անցյալ տարվա ընթացքում մենք նորմալ բանակցություններ ենք վարել, ստորագրել ենք 2 փաստաթուղթ, բայց Թուրքիայի որոշ պաշտոնական անձինք որոշել են նախապայմաններ առաջադրել եւ հայ-թուրքական հարաբերությունները կապել ղարաբաղյան հիմնախնդրի հետ: Մենք չենք կարող ընդունել այդ նախապայմանները, եւ մենք շատ լավ հասկանում ենք, թե ինչ դեր է խաղում Թուրքիան տարածաշրջանում: Բայց թուրքերն իրենք պետք է հասկանան, որ 21-րդ դարում չեն խոսում նախապայմանների լեզվով, եւ որ նախապայմանների ցանկացած առաջադրում հանգեցնում է հակազդեցության»,- ընդգծել է ՀՀ նախագահը:



«Արի տուն» նախագծի նպատակն է` զարգացնել Հայաստան-Սփյուռք հարաբերությունները: Նախագծի ծրագրի մեջ մտնում է` մասնակիցներին ծանոթացնել հայկական ընտանիքի կենցաղի հետ եւ մերձեցնել նրանց այդ ընտանիքների հետ: Ծրագրին մասնակցել են 63 ուսանողներ Ռուսաստանից, Թուրքիայից, Եգիպտոսից, Սիրիայից, Վրաստանից եւ Ուկրաինայից: «Արի տուն» ծրագրի մասնակիցների հաջորդ խումբը Հայաստան կժամանի օգոստոսի 1-ին: