ԱՄՆ-ն կոչ է արել դադարեցնել ռազմական գործողությունները Հարավային Օսեթիայի տարածքում

PanARMENIAN.Net - Միացյալ Նահագները կոչ է արել դադարեցնել ռազմական գործողությունները Հարավային Օսեթիայում: «Մենք դիմում ենք Մոսկվային, որպեսզի վերջինս ճնշում գործադրի Հարավային Օսեթիայի իշխանությունների վրա` ռազմական գործողությունների դադարեցման նպատակով»,- ասվում է ԱՄՆ Պետդեպարտամենտի հայտարարությունում:



Հիշեցնենք, որ այսօր Վրաստանի նախագահ Միխայիլ Սահակաշվիլին խնդրել է ԱՄՆ-ին օգնել Վրաստանին Ռուսաստանի դեմ պատերազմում: Իր հերթին, Վրաստանի Անվտանգության խորհրդի քարտուղար Կախա Լամայան հայտարարել է, որ Ռուսաստանն ու Վրաստանը «շատ մոտ են պատերազմին», եթե արդեն պատերազմական դրությունում չեն այն բանից հետո, երբ ռուսական զորքերը մտան Հարավային Օսեթիայի տարածք:



Վրացական զորքերը օգոստոսի լույս 8-ի գիշերը սկսել են չճանաչված Հարավային Օսեթիայի հանրապետության մայրաքաղաք Ցխինվալի վրա հարձակումը: Ինչպես հաղորդում է Հարավային Օսեթիայի պաշտպանության նախարարությունը, օգոստոսի 7-ին մոտավորապես 23:30-ին տեղի ժամանակով վրացական Էրղնեթի, Նիկոզի գյուղերի կողմից ծանր հրետանուց կրակ է բացվել Ցխինվալի ուղղությամբ: Օգոստոսի 8-ի առավոտյան վրաց զինվորականները գրավել են Ցխինվալիի մի շարք շրջաններ եւ մերձակա 11 գյուղերը:



Վրաց-օսական հակամարտության գոտու խաղաղապահ ուժերի հրամանատար, գեներալ-մայոր Մարատ Կուլախմետովը հայտարարել է, որ զանգավածային ռմբակոծության արդյունքում Հարավային Օսեթիայի մայրաքաղաքը գրեթե ամբողջովին ավերվել է: «Երկարաժամ ռմբակոծության արդյունքում Ցխինվալին ոչնչացել է»,- ասել է Կուլախմետովը: Հաղորդվում է, որ քաղաքում այժմ խաղաղություն է. կրակոցներ չեն հնչում, Ցխինվալիում հրդեհներ են: «Այնպիսի տպավորություն է, որ այրվում է ամեն երկրորդ տունը»,- հաղորդում է Ինտերֆաքսի թղթակիցը: Մինչդեռ, մի շարք աղբյուրների համաձայն, ռուսական զրահատեխնիկայի շարասյունը մտնում է քաղաք: Ինչպես հայտարարել է Վրաստանի նախագահ Միխայիլ Սահակաշվիլին, Հարավային Օսեթիայի տարածք են մտել մոտ 150 ռուսական տանկ եւ զրահամեքենա: