Իրանը չի կարող վերահսկել Բուշերի ԱԷԿ-ը, գտնում է ռուս փորձագետը

PanARMENIAN.Net - Բուշերի ատոմակայանի շինարարությունն ու աշխատանքը պետք է իրականացնեն բարձրորակ մասնագետներ, ոչ թե Իրանի խորհրդարանի անդամները, գտնում է ՌԴ հասարակական-քաղաքական հետազոտությունների կենտրոնի տնօրեն Վլադիմիր Եվսեևը: Նա տարակուսանք է հայտնել առ այն, որ Իրանի խորհրդարանում ստեղծվում է վեց հոգուց բաղկացած հանձնաժողով, որը հետաքննելու է Բուշերի ԱԷԿ-ի գործունեության դադարեցման պատճառները:

«Ինչպես կարող են իրանցիները գնահատել ռուս մասնագետների աշխատանքն ու որակավորումը, որոնք ավելի բարձր են իրենց որակավորմամբ: Անհեթեթ իրավիճակ է ստեղծվում, քանի որ հանձնաժողովը մտադիր է փաստորեն կրկնակի հսկողություն սահմանել, թեև Ռուսաստանն ինքը շահագրգռված է անվտանգության ապահովման հարցում: Չնայած նրան, որ պարսիկները չափազանց բարդ իրավիճակ ստեղծեցին ԱԷԿ-ի անվտանգության ապահովման համար, ռուս մասնագետներն անում են ամեն ինչ, ապահովելու համար ռեակտորի անվտանգությունը: Սարքավորումները, որոնք դուրս են եկել շարքից և արգելակել են կայանի շահագործումը, արտադրվել են Գերմանիայում նախորդ դարի 60-ականներին»,-նշել է փորձագետը:

Եվսեևը գտնում է, որ հանձնաժողովը կարող է ինչ-որ կերպ ճնշում գործադրել ռուսական կողմի վրա՝ կայանը շահագործման հանձնելու առումով, գրում է «Trend» գործակալությունը: