Ի՞նչ է անում պետությունը գործազրկության մակարդակը նվազեցնելու համար

PanARMENIAN.Net - Նոր աշխատատեղեր ստեղծելու կամ գործազրկության մակարդակը նվազեցնելու նպատակով իրականացվում են զբաղվածության պետական մի շարք ծրագրեր: Այսօր լրագրողների հետ հանդիպմանն այս մասին ասաց Զբաղվածության պետական ծառայության պետի տեղակալ Արտակ Սիմոնյանը` ներկայացնելով 2012 թվականի ապրիլի 1-ի դրությամբ իրականացվող ծրագրերը:

Առաջին նման ծրագիրը «Անմրցնուկ անձանց աշխատանքի տեղավորելու դեպքում աշխատավարձի մասնակի փոխհատուցում գործատուին» ծրագիրն է, որի շնորհիվ տարեսկզբից աշխատանքի է տեղավորվել 62 աշխատանք փնտրող, որոնցից 29-ը հաշմանդամ է: Նախորդ տարվանից այս ծրագրով շարունակում է աշխատել 194 մարդ:

Հաջորդը «Ձեռնարկատիրական գործունեությամբ զբաղվելու նպատակով պետական գրանցման համար գործազուրկներին և հաշմանդամներին տրվող ֆինանսական աջակցության» ծրագիրն է, որում արդեն ընդգրկվել է 36 աշխատանք փնտրող, որոնցից 13-ը կին, 11-ը` երիտասարդ:

Երրորդը «Մասնագիտական ուսուցման կազմակերպում» ծրագիրն է, որով կազմակերպվել է 143 աշխատանք փնտրողի մասնագիտական ուսուցում` աշխատաշուկայում պահանջարկ ունեցող մասնագիտություններով, 116-ը կանայք, 79-ը երիտասարդներ:

Արտակ Սիմոնյանը նշեց, որ նաև մի շարք ծրագրեր են իրականացվել ՄԱԿ-ի ու ու ԱՄՆ ՄԶԳ հայաստանյան գրասենյակի աջակցությամբ, կնքվել են մի շարք համաձայնագրեր: