«Հարսնաքարի գործով» տուժող. Բոլորը հարվածում էին, կանգնած մարդ կամ բաժանող չի եղել

PanARMENIAN.Net - Այսօր «Հարսնաքարի գործով» դատական նիստի ժամանակ ընդմիջումից հետո տուժող Արտակ Բայադյանը նորից հայտարարեց. «Ամենաքիչը տասնըհինգ հոգի էին, բոլորը, ում տեսել եմ, հարվածում էին: Կանգնած մարդ կամ բաժանող չի եղել: Ամեն ինչ պլանավորված էր»:

Մեղադրյանլների պաշտպանները շարունակեցին հարցեր տալ: Ամբաստանյալ Արման Բաղդասարյանի պաշտպան Միհրան Պողոսյանը և ամբաստանյալ Արման Խաչատրյանի պաշտպան Ավագ Լալայանը հարցեր ուղղեցին իրենց պաշտպանյալներին ճանաչման ներկայացնելու քննչական գործողության ժամանակ տեսաձայնագրման, իրենց պաշտպանյալների հետ ներկայացված անձանց արտաքին տեսքի ու հագուկապի նմանության մասին:

Արտակ Բայադյանը պատասխանեց, որ մյուսների մասին մանրամասներ չի հիշում, քանի որ մի հայացք է գցել ու ճանաչել ամբաստանյալներին:

Այս դատական նիստի ժամանակ պաշտպանական կողմը միջնորդեց այսուհետ դատական նիստերն անցկացնել շաբաթական մեկ անգամ՝ իրենց պաշտպանյալների պաշտպանական իրավունքը լիարժեք իրագործելու նպատակով: Դատարանը նշեց, որ արդեն որոշում է կայացրել շաբաթական 2 դատական նիստ անցկացնելու մասին, սակայն չբացառեց, որ հետագայում այդ որոշումը կարող է վերանայվել: Նախորդ դատական նիստում սկսված, այսօր շարունակված տուժող Արտակ Բայադյանի հարցաքննությունը կշարունակվի նոյեմբերի 9-ին: