Հայաստանի և Վրաստանի միջև 6 ամսում առևտրաշրջանառություն աճել է 42%-ով. Ղարիբաշվիլին Երևանում է (թարմացված)

Հայաստանի և Վրաստանի միջև 6 ամսում առևտրաշրջանառություն աճել է 42%-ով. Ղարիբաշվիլին Երևանում է (թարմացված)

PanARMENIAN.Net - Հայաստանի Հանրապետության վարչապետ Հովիկ Աբրահամյանի հրավերով օգոստոսի 21-ին պաշտոնական այցով Հայաստան է ժամանել Վրաստանի վարչապետ Իրակլի Ղարիբաշվիլիի գլխավորած պատվիրակությունը:

«Զվարթնոց» օդանավակայանում Վրաստանի իր գործընկերոջը դիմավորել է Հովիկ Աբրահամյանը: Հայաստանի և Վրաստանի վարչապետները ողջունել են երկու երկրների կառավարությունների անդամներին և ուղևորվել Ծիծեռնակաբերդի հուշահամալիր: Հովիկ Աբրահամյանը և Իրակլի Ղարիբաշվիլին ծաղկեպսակ են դրել Հայոց ցեղասպանության զոհերի հիշատակը հավերժացնող հուշահամալիրին և ծաղիկներ՝ անմար կրակի մոտ՝ հարգանքի տուրք մատուցելով Մեծ Եղեռնի զոհերի հիշատակին:Այնուհետև Իրակլի Ղարիբաշվիլին եղևնի է տնկել Ծիծեռնակաբերդի հուշահամալիրի Հիշողության պուրակում:

Երկու երկրների վարչապետների առանձնազրույցից հետո կայացել են պաշտոնական պատվիրակությունների մասնակցությամբ ընդլայնված կազմով բանակցությունները: Այնուհետև վարչապետներ Հովիկ Աբրահամյանը և Իրակլի Ղարիբաշվիլին ՀՀ կառավարության մամուլի կենտրոնում հանդիպել են զանգվածային լրատվամիջոցների ներկայացուցիչների հետ և հանդես եկել բանակցությունների արդյունքներն ամփոփող հայտարարությամբ:

«Վերահաստատելով երկու երկրների միջև առկա ամուր բարեկամական կապերը և առկա հարաբերություններն էլ ավելի զարգացնելու պատրաստակամությունը՝ քննարկեցինք երկուստեք հետաքրքրություն ներկայացնող հարցերի լայն շրջանակ, որը ներառում է առևտրատնտեսական հարաբերություններին, ենթակառուցվածքների զարգացմանը, կրթական, հումանիտար և մշակութային կապերի խորացմանն առնչվող խնդիրներ»,- իր ելույթում նշել է Հովիկ Աբրահամյանը:

Նա նշել է, որ ընդգծվել է հայ-վրացական միջկառավարական հանձնաժողովի գործունեության կարևորությունը և կանոնավոր հանդիպումների անհրաժեշտությունը, որը երկու երկրների առևտրատնտեսական հարաբերությունների փոխշահավետ զարգացման լավագույն միջոցն է:

«Շահագրգիռ քննարկումներ կայացան ենթակառուցվածքների զարգացման և տրանսպորտային կապի բարելավման հետ կապված հարցերի շուրջ: Մանրամասն քննարկվեց սահմանային անցակետերի արդիականացման խնդիրը, մասնավորապես, Բագրատաշեն-Սադախլո անցակետում նոր կամրջի շինարարության հարցը: Քննարկեցինք անցած գիշեր Վերին Լարս անցակետում տեղի ունեցած սողանքի ու դրա հետևանքները վերացնելու խնդիրը, իմ գործընկերոջն առաջարկեցի Հայաստանի համապատասխան ծառայությունների աջակցությունը: Երկուստեք կարևորվեց նաև պատմամշակութային հարուստ ժառանգության պահպանման և վերականգնման խնդիրը»,- ասել է նա` հավելելով, որ բանակցություններն ընթացել են բարեկամ երկրներին բնորոշ ջերմ և կառուցողական մթնոլորտում:

Վրաստանի վարչապետն իր հերթին նշել է, որ համաձայնության են եկել` էլ ավելի պետք է խորացնենլ Վրաստանի և Հայաստանի միջև գոյություն ունեցած սերտ համագործակցությունը, և տվյալ այցը հենց այս նպատակին է ծառայում:

«Մենք ընթացիկ տարվա 6 ամսվա կտրվածքով 42 տոկոսով ավելացրել ենք առևտրաշրջանառությունը: Այս ամենը խոսում է այն մասին, որ մեր երկու երկրների միջև գոյություն ունեցած տնտեսական հարաբերությունները զարգանում են, և մենք, իհարկե, դա կշարունակենք: Շատ կարևոր է, որ մեր երկրների միջև հանդիպումներն ընթանան ու զարգանան ոչ միայն բարձր մակարդակով, այլև գերատեսչությունների մակարդակով:

Մենք խոսեցինք տարածաշրջանում կայունության ամրապնդման հարցերի շուրջ: Հավելեմ, որ ունենք զբոսաշրջության աճ, դրական միտում կա այդ բնագավառում և համաձայնության ենք եկել, որ ամեն ինչ կանենք էլ ավելի խորացնելու այս հարաբերությունները: Ցանկանում եմ նաև նշել, որ մենք համաձայնության ենք եկել, որ Հայաստանը և Վրաստանը համատեղ կկառուցեն կամուրջ: Այսօր իմացանք, որ կա հետաքրքիր նախաձեռնություն կամուրջը կոչել Բարեկամության կամուրջ, և մենք հաճույքով համաձայնեցինք այդ առաջարկին: Մենք խոսել ենք նաև մշակութային և մարդասիրական բնագավառների հարցերի շուրջ»,- ասել է Ղարիբաշվիլին` հավելելով, որ երկու-երեք օրում կվերականգնեն գազի մատակարարումը, և գազատարը կվերականգնվի:

Ավելի վաղ հաղորդվել էր, որ Վրաստանի վարչապետ Իրակլի ՂարիբաշվիլինԵրևանում կքննարկի երկկողմ հարաբերությունների ակտուալ հարցերը:

Հատուկ ուշադրություն կդարձվի իրավիճակին, որը ստեղծվել է` կապված Վրաստանի ԵՄ հետ ասոցացման համաձայնագրի ստորագրման ու Հայաստանի` Մաքսային միության անդամ դառնալու հետ: Կողմերը պատրաստվում են քննարկել ծագող հակասություններն ու գտնել գործակցության ընդունելի ձևաչափ, ասվում է հաղորդագրության մեջ:

Բացի այդ, Հայաստանը պատրաստվում է բարձրացնել Վրաստանի կողմից սեպտեմբերի 1-ից Հայաստանի հետ վիզային ռեժիմ մտցնելու հարցը: Այս մասին ավել վաղ հայտարարել էր վարչապետ Հովիկ Աբրահամյանը, գրում է Նովոստի Արմենիյան:

Վիզային ռեժիմի փոփոխությունները ուժի մեջ կմտնեն 2014 թվականի սեպտեմբերի 1-ից, սակայն, դրանք չենք անդրադառնա Հայաստանի քաղաքացիների վրա, որի հետ մուտքի արտոնագրային ռեժիմ չի գործում: Ինչպես պարզաբանել են նախարարությունում, որոշումը կայացվել է միգրացիոն հոսքերի կառավարման բարելավման նպատակով: Նշվում է նաև նման նորամուծության հատուկ նշանակությունը Եվրամիության հետ գործակցության կապակցությամբ:

Դիվանագիտական ներկայացուցչություններում վիզա ստանալ հնարավոր կլինի որոշ գումարի դիմաց։ Կնիքի դիզայնն առայժմ քննարկվում է, բայց արդեն հայտնի է, որ այն շենգենի արտոնագրի ձևի է լինելու։ Վիզային ռեժիմի ընդունումից հետո զբոսաշրջիկների՝ երկրում գտնվելու ժամկետները խիստ կհստակեցվեն։ Ընթացքին ամբողջովին հետևելու է միգրացիոն ծառայությունը, որը շուտով կսկսի իր աշխատանքը։ Օտարերկրացիների ժամանակավոր տեղավորման կենտրոնի շինաշխատանքները շուտով կավարտվեն՝ այդտեղ կտեղափոխվեն անձինք, ովքեր կխախտեն արտոնագրային ռեժիմն ու ստիպված կլինեն լքել երկիրը։ Դրա համար պատասխանատու է լինելու ՆԳՆ-ն։ Ավելի ուշ Թբիլիսիում Հայաստանի դեսպանատան հարցմանն ի պատասխան Վրաստանի ԱԳՆ-ն հայտարարեց, որ Հայաստանի հետ մուտքի արտոնագրեր չեն սահմանվի:

Ինչպես հայտնել են ՀՀ Կառավարությունից, այցի շրջանակում նախատեսված են Վրաստանի վարչապետի հանդիպումները ՀՀ նախագահ Սերժ Սարգսյանի, ՀՀ Ազգային ժողովի նախագահ Գալուստ Սահակյանի և բարձրաստիճան այլ պաշտոնյաների հետ։

Ղարիբաշվիլիի նախատեսվող այցի մասին օգոստոսի 18-ին Ծաղկաձորում «Բազի-2014» համահայկական երիտասարդական հավաքի մասնակիցների հետ հանդիմանն ասել էր նաև վարչապետ Հովիկ Աբրահամյանը: Նա նաև նշել էր, որ նախնական պայմանավորվածության համաձայն սեպտեմբերի 8-ից 9-ը Հայաստան կժամանի ՌԴ վարչապետ Դմիտրի Մեդվեդևը, իսկ ինքն Աբրահամյանը սեպտեմբերի 15-ին կմեկնի Թեհրան, որտեղ կհանդիպի Իրանի իր գործընկերոջ հետ:

«Տնտեսական առումով սրանք մեզ համար շատ կարևոր երկրներ են: Ռուսաստանի, Վրաստանի ու Իրանի հետ կապված բազմաթիվ ծրագրեր կան»,- ասել է Աբրահամյանը:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---