Ադրբեջանի հետ սահմանը ՀՀ քաղաքացի՞ է հատել. Հայկական կողմը ճշտում է տեղեկությունը

PanARMENIAN.Net - Այսօր՝ օգոստոսի 26-ին, Տավուշի մարզից ադրբեջանական Ղազախի շրջանի Քեմերլի գյուղ է անցել ՀՀ քաղաքացի, գրում է ադրբեջանական Musavat.com-ը՝ հավելելով, որ նրա տվյալներն առայժմ ճշտել չի հաջողվել։ ՀՀ ՊՆ մամուլի քարտուղար Արծրուն Հովհաննիսյանի խոսքով, հայկական կողմն այժմ ճշտում է տեղեկությունը, գրում է «Ռազմինֆո»-ն։

Ադրբեջանական կայքի համաձայն, քաղաքացին 53-54 տարեկան է, նա մոտ 20 րոպե մնացել է Քեմերլիի գյուղացիներից մեկի տանը, ապա ադրբեջանցի զինվորականները եկել ու տարել են նրան։

Օգոստոսի 7-ին Թովուզի շրջանում Կարեն Պետրոսյանը Չինարիից հատել էր հայ-ադրբեջանական սահմանն ու ձերբակալվել, այնուհետև օգոստոսի 8-ի առավոտյան «հանկարծամահ եղել»։ Որպես մահվան պատճառ նշվում էր «սիրտ-անոթային անբավարարությունը»։ Նրա դին մինչև օրս չի վերադարձվել հայկական կողմին:

Մինչև այդ Ադրբեջանի ՊՆ-ն լուսանկարներ ու տեսագրություն էր տարածել, որտեղ Կարեն Պետրոսյանին, ռազմական համազգեստ հագցրած, բռնի ուժով բերում էին Ադրբեջանի ԶՈւ Շամխորի 3-րդ բանակային կորպուսի հրամանատար, գեներալ-լեյտենանտ Ռովշան Աքփերովի մոտ՝ փորձելով Չինարիի բնակչին որպես «դիվերսանտ» ներկայացնել։ Մինչդեռ Չինարիի գյուղապետը հաստատել էր, որ գերին իրենց համագյուղացին է, քաղաքացիական անձ է։

Օգոստոսի 14-ին ՀՀ քննչական կոմիտեն հաղորդագրություն էր տարածել` նշելով, որ Ադրբեջանում գերության մեջ գտնվելու ընթացքում Կարեն Պետրոսյանի մահվան դեպքի առթիվ հարուցվել է քրգործ:

Հունվարի 28-ին Ադրբեջանի Թովուզի շրջանում ձերբակալվել էր սահմանը հատած հոգեկան խնդիրներ ունեցող Վերին Կարմիրաղբյուրի 77-ամյա բնակիչ Մամիկոն Խոջոյանը։ Մեկ ամսից ավելի գտնվելով գերության մեջ, մարտի 4-ի երեկոյան ՀՀ ՊՆ-ն տեղեկացրել էր, որ հոգեկան հիվանդությամբ տառապող Խոջոյանը ՀՀ իշխանությունների խնամքին է հանձնվել առողջական լուրջ խնդիրներով:

Հայրենադարձվելուց հետո Խոջոյանը տեղափոխվել էր Իջևանի բժշկակական կենտրոն, որտեղ անցկացված հետազոտությամբ նրա մարմնին բազմաթիվ կապտուկներ, կոտրվածքներ և վնասվածքներ էին հայտնաբերվել: Մայիսի 20-ին Խոջոյանը մահացել էր: